Սևիկյանի ծառայություններն առաջարկվել են ՌՊԼ-ի ակումբներին, սակայն որևէ հստակություն չկա

Հայաստանի ազգային հավաքականի կիսապաշտպան Էդգար Սևիկյանի ծառայություններն առաջարկվել են ՌՊԼ-ի ակումբներին, սակայն որևէ հստակություն չկա։

Այս մասին տեղեկացնում է ИнсайдЯН տելեգրամյան ալիքը։

Աղբյուրի տեղեկությունների համաձայն, «Ֆերենցվարոշի» կիսապաշտպանի ապագայի մասով որևէ հստակություն դեռ չկա։

Նշվում է, որ Հունգարիայի չեմպիոնը հույսեր չի կապում Սևիկյանի հետ՝ առաջնությունում առկա սահմանափակումների պատճառով։ Ավելի վաղ, Սևիկյանը հայտավորված չի եղել Չեմպիոնների լիգայի որակավորման 3-րդ փուլի և փլեյ-օֆֆի «Լուդոգորեցի» և «Ղարաբաղի» դեմ հանդիպումներին։

Հայ կիսապաշտպանն այս մրցաշրջանում մասնակցել է ՉԼ-ի որակավորման 2-րդ փուլի «Նոայի» դեմ 1-ին ու առաջնության 1-ին տուրի ՄՏԿ-ի դեմ խաղերին, իսկ դրան հաջորդող 6 պաշտոնական խաղերում 24-ամյա ֆուտբոլիստը խաղաժամանակ չի ստացել կամ բացակայել է թիմի հայտացուցակից։