Աղբյուր․ Մադրիդի Ատլետիկոն կապ է հաստատել Սպերցյանի ներկայացուցիչների հետ

Ատլետիկո Մադրիդը հետաքրքրություն է ցուցաբերել 25-ամյա հայ կիսապաշտպան, «Կրասնոդարի» ավագ Էդուարդ Սպերցյանի նկատմամբ։

Ինչպես հայտնում է transferfeed.com կայքը, իսպանական ակումբը կապ է հաստատել ֆուտբոլիստի ներկայացուցիչների հետ։ Այնուամենայնիվ, այս պահին, հնարավոր տրանսֆերի մասին կոնկրետ տեղեկություններ չկան։

Նշվում է, որ չնայած այն բանին, որ մի շարք ակումբներ, այդ թվում՝ Պորտուգալիայից, հետաքրքրված են Սպերցյանով, սակայն միակ պաշտոնական առաջարկը ներկայացրել է «Սաութհեմփթոնը»։ «Կրասնոդարը» մերժել է անգլիական ակումբի առաջարկը։

Այս մրցաշրջանում Սպերցյանը «Կրասնոդարի» կազմում անցկացրած 8 խաղերում դարձել է 4 գոլի և 4 գոլային փոխանցման հեղինակ։ Նրա պայմանագիրը ռուսական ակումբի հետ ուժի մեջ է մինչև 2026թ. հունիսը, իսկ Transfermarkt-ի գնահատմամբ՝ նրա շուկայական արժեքը կազմում է 25 միլիոն եվրո։