Պետք է վաղն էլ խաղադաշտ դուրս գանք նույն մոտեցմամբ․ Էրիկ Բոակյեն՝ Օլիմպիայի դեմ պատասխան խաղից առաջ

Կոնֆերենցիաների լիգայի որակավորման փլեյ-օֆֆի «Նոա»-«Օլիմպիա Լյուբլյանա» պատասխան խաղից առաջ թիմի պաշտպան Էրիկ Բոակյեն ու մարզիչ Սանդրո Պերկովիչ պատասխանել են լրագրողների հարցերին․

Ներկայացնում ենք Բոակյեի ուշագրավ մտքերը․

«1-ին հանդիպմանը մեզ օգնեց կենտրոնացվածությունն ու մոտիվացիան, որն ունեինք խաղից առաջ»:

«Յուրաքանչուր պարտությունից հետո լարվածություն լինում է։ Մենք 1-ին հանդիպմանը մոտեցանք շատ հանգիստ, հաղթողի հոգեբանությամբ ու մտածողությամբ, հաղթանակի ծարավով։ Պարտությունները շատ հիասթափեցնող են, բայց հենց այս մոտեցումը մեզ օգնեց հաղթել»։

«Պետք է վաղն էլ խաղադաշտ դուրս գանք նույն մոտեցմամբ, ամբողջ ուժով, մոտիվացիայով ու հասնենք հաջողության»։

«Շատ կարևոր է մնալ նույն մոտեցմամբ ու մոտիվացիայով՝ ոչ մի վայրկյան չմոռանալով, թե ինչ կա առջևում։ Միայն միասնաբար կկարողանանք հաջողության հասնել ու անցնել հաջորդ փուլ»։

Հիշեցնենք, որ թիմերի միջև կայացած 1-ին հանդիպումն ավարտվել էր Հայաստանի չեմպիոնի հաղթանակով՝ 4։1 հաշվով։

«Նոա»-«Օլիմպիա Լյուբլյանա» հանդիպումը կկայանա օգոստոսի 28-ին՝ Աբովյանի Վահագն Թումասյանի անվան մարզահամալիրում։ Մեկնարկը՝ 20։00-ին։