Նոան պատասխան խաղում ևս հաղթեց Օլիմպիային ու կխաղա Կոնֆերենցիաների լիգայի հիմնական փուլում (տեսանյութ)

Կոնֆերենցիաների լիգայի որակավորման փլեյ-օֆֆում «Նոան» ընդունել էր «Օլիմպիա Լյուբլյանային» և հաղթեց 3։2 հաշվով։

Հանդիպման հաշիվը 13-րդ րոպեին բացեց Հելդեր Ֆերեյրան։ 7 րոպե անց Ֆերեյրայի փոխանցումից աչքի ընկավ Մաթեյուս Այասը։ 2-րդ կեսի մեկնարկից 10 րոպե անց «Օլիմպիան» վաստակեց 11-մետրանոցի իրավունք, որը դիպուկ իրացրեց Անտոնիո Մարինը։ 76-րդ րոպեին Իվան Դուրդովը վերականգնեց հաշվի հավասարությունը, սակայն 1 րոպե անց փոխարինման մտած Հովհաննես Հարությունյանը կրկին առաջ մղեց Հայաստանի չեմպիոնին։

«Նոայի» բոլոր գոլերը կարող եք դիտել այստեղ։

Այսպիսով, «Նոան» հաղթում է դիմակայության 2 խաղերում էլ ընդհանուր՝ 7։3 հաշվով և որակավորվում Կոնֆերենցիաների լիգայի հիմնական փուլին, որտեղ իր մրցակիցներին կիմանա վաղը։