Թիմը խաղաց այնքան, որքան՝ հնարավոր էր. Էդգար Թորոսյան

Ֆուտբոլի Հայաստանի գավաթի խաղարկության ⅛ եզրափակիչում Նոան 2։0 հաշվով հաղթանակի հասավ Ալաշկերտի նկատմամբ։

Խաղից հետո Ալաշկերտի գլխավոր մարզչի օգնական Էդգար Թորոսյանը պատասխանել է լրագրողների հարցերին։

-Ի՞նչ կասեք խաղի մասին։

-Առաջին խաղակեսը բավականին լավ թիմային պաշտպանություն տարանք՝ ինչպես պլանավորում էինք, պետք է պաշտպանվեինք ու խաղայինք հակագրոհների վրա, ինչքան որ թույլ տվեց Նոան, այդքան էլ կարողացանք գրոհել։ Առաջին խաղակեսի վերջում ընդունեցինք գնդակ։ 2-րդ խաղակեսը մի քիչ տարբերվեց, արդեն կորցնելու բան չունեինք, փոխեցինք համակարգը, 4-4-2 դարձանք, 2-րդ հարձակվողը դաշտ մտավ, հետո 3-րդը, էլի ավելացրինք հարձակվողների քանակը, փորձեցինք մի քիչ ավելի բարձր խաղալ, այդտեղ ավելի շատ զոնաներ բացվեց, վտանգավոր պահեր կային մրցակցի կողմից, բայց թիմը խաղաց այնքան, ինչքան որ այսօր հնարավոր էր։ Նոան մեզանից ուժեղ էր, հաղթեց, շնորհավորում եմ։

-Թիմի նախապատրաստական շրջանն ինչպե՞ս կգնահատեք և կազմի առումով շա՞տ բան է փոխվել, որքանո՞վ եք հասցրել ավելի լավ պատրաստվել մրցաշրջանի 2-րդ հատվածին։

-Անցկացրել ենք հավաք։ նախապատրաստական շրջանը չեմ ասի, որ շատ լավ, բայց բավարար եմ գնահատում։ Ֆուտբոլիստներ կան, որ 3-4 օր առաջ են միացել թիմին, այսօր էլ 30-40 րոպե խաղացին, բնական է, որ պատրաստ չեն, բայց ունենք այն՝ ինչ ունենք։ Իրենց վիճակը լավանա, թիմի խաղը էլ ավելի լավ կլինի։

-Թիմի առջև ի՞նչ նպատակ է դրված։

-Դե ինչպես գիտեք մրցաշարային աղյուսակում շատ վատ տեղում ենք, պետք է լավ թիմ, լավ կորիզ, պինդ ընկույզ դառնանք։

-Ի՞նչ կասեք նոր ֆուտբոլիստների որակի մասին։

-Որակյալ ֆուտբոլիստներ են, վատ ֆուտբոլիստներ չեն, ուղղակի այսօր դեռ պատրաստ չէին, ստիպված էինք իրենց այսօր դուրս բերել խաղադաշտ։