Արսեն Հարությունյանը հաղթելով Օլիմպիական փոխչեմպիոնին՝ դուրս եկավ աշխարհի առաջնության կիսաեզրափակիչ

Զագրեբում ընթացող ըմբշամարտի աշխարհի առաջնությունում այսօր պայքարի մեջ են մտել 57 կգ քաշային ազատ ոճայինները։

Այդ քաշային կարգում Հայաստանի ներկայացուցիչ Արսեն Հարությունյանը որակավորման փուլում մրցում էր ուկրաինացի Վլադիսլավ Աբրրամովի հետ ու 2 րոպե 17 վայրկյանում առավելության հասավ վերջինիս նկատմամբ՝ 10։0 հաշվով։ 1/8 եզրափակչում հայ ըմբիշը լարված գոտեմարտում 13-8 հաշվով հաղթանակի հասավ մոնղոլ  Մունխ Բատհույագի նկատմամբ՝ դուրս գալով քառորդ եզրափակիչ, որտեղ 14-3 հաշվով ջաջախիչ հաղթանակ տարավ ԱՄՆ-ն ներկայացնող, Օլիմպիական խաղերի փոխչեմպիոն Սփենսեր Լիի նկատմամբ։ Եվրոպայի քառակի չեմպիոնը գոտեմարտն ավարտեց ժամանակից շուտ։

Կիսաեզրափակչում Հարությունյանի մրցակիցը կլինի Կորեայի Ժողովրդական Դեմոկրատական Հանրապետության ներկայացուցիչ Չոնսոն Հանը, որը քառորդ եզրափակչում առավելության հասավ Մեքսիկայի ներկայացուցիչ Բրավո Յանգի նկատմամբ։

Կիսաեզրափակչի մյուս զույգը կազմել են Գուլոմջոն Աբդուլաևն (Ուզբեկստան) ու Բեկզատ Ալմազ Ուուլուն (Ղրղզստան)։

Այսօր պայքարի մեջ մտած Հայաստանի մյուս ներկայացուցիչը՝ 74 կգ քաշային Հրայր Ալիխանյանը, 1/16 եզրափակչում զիջեց Իրանի Իսլամական Հանրապետության ներկայացուցիչ Յոնես Էմամիին։ Վերջինիս եզրափակիչ հասնելու պարագայում Ալիխանյանն իրավունք կստանա անցկացնելու սփոփիչ գոտեմարտեր և պայքարելու բրոնզե մեդալի համար։

Հիշեցնենք, որ այսօր երեկոյան բրոնզե մեդալի համար կպայքարի 70 կգ քաշային Արման Անդրեասյանը։

Վաղը պայքարի մեջ կմտնի 65 կգ քաշային Վազգեն Թևանյանը։ 

Ըմբշամարտի աշխարհի առաջնությունում հայ մարզիկների ելույթների ուղիղ թարմացումներին հետևեք մեր տելեգրամյան ալիքում։