Հարությունյանը պարտվեց կիսաեզրափակչում ու կպայքարի բրոնզե մեդալի համար. Ալիխանյանը կորցրեց մեդալային հույսերը

Զագրեբում ընթացող ըմբշամարտի աշխարհի առաջնությունում այսօր պայքարի մեջ են մտել 57 կգ քաշային ազատ ոճայինները։

Այդ քաշային կարգում Հայաստանի ներկայացուցիչ Արսեն Հարությունյանը որակավորման փուլում մրցում էր ուկրաինացի Վլադիսլավ Աբրրամովի հետ ու 2 րոպե 17 վայրկյանում առավելության հասավ վերջինիս նկատմամբ՝ 10։0 հաշվով։ 1/8 եզրափակչում հայ ըմբիշը լարված գոտեմարտում 13-8 հաշվով հաղթանակի հասավ մոնղոլ  Մունխ Բատհույագի նկատմամբ՝ դուրս գալով քառորդ եզրափակիչ, որտեղ 14-3 հաշվով ջաջախիչ հաղթանակ տարավ ԱՄՆ-ն ներկայացնող, Օլիմպիական խաղերի փոխչեմպիոն Սփենսեր Լիի նկատմամբ։ Եվրոպայի քառակի չեմպիոնը գոտեմարտն ավարտեց ժամանակից շուտ։

Կիսաեզրափակչում Հարությունյանի մրցակիցը Կորեայի Ժողովրդական Դեմոկրատական Հանրապետության ներկայացուցիչ Չոնսոն Հանն էր, որին հայ ըմբիշը զիջեց 1-4 հաշվով։

Կիսաեզրափակչի մյուս զույգում էլ Գուլոմջոն Աբդուլաևը (Ուզբեկստան) 0-8 հաշվով զիջեց Բեկզատ Ալմազ Ուուլուին (Ղրղզստան)։

Այսօր պայքարի մեջ մտած Հայաստանի մյուս ներկայացուցիչը՝ 74 կգ քաշային Հրայր Ալիխանյանը, 1/16 եզրափակչում զիջեց Իրանի Իսլամական Հանրապետության ներկայացուցիչ Յոնես Էմամիին։ Վերջինս, քառորդ եզրափակչում դուրս մնաց ոսկե մեդալի համար պայքարից, հետևաբար, Ալիխանյանը մնաց առանց մեդալային հույսերի։

Հիշեցնենք, որ քիչ անց բրոնզե մեդալի համար կպայքարի 70 կգ քաշային Արման Անդրեասյանը։

Վաղը պայքարի մեջ կմտնի 65 կգ քաշային Վազգեն Թևանյանը։ 

Ըմբշամարտի աշխարհի առաջնությունում հայ մարզիկների ելույթների ուղիղ թարմացումներին հետևեք մեր տելեգրամյան ալիքում։