Թևանյանը պարտվեց մեկնարկում

Զագրեբում ընթացող ըմբշամարտի աշխարհի առաջնությունում այսօր պայքարի էին դուրս եկել 65 կգ քաշային ազատ ոճայինները։

Այդ քաշային կարգում Հայաստանի ներկայացուցիչ Վազգեն Թևանյանը մրցում էր տաջիկ Աբդուլմաժիդ Կուդիևի հետ և մինչ ընդմիջում հաղթում էր 5։0 հաշվով։

Ընդմիջումից հետո Կուդիևը գլորումներ կատարեց՝ հաշիվը դարձնելով 5։16։ Հայ մարզիկը չելենջի դիմեց, որը հաղթելուց հետո հաշիվը դարձավ 5։14։ Գոտեմարտի մնացած 1 րոպե 43 վայրկյանում Թևանյանը կարողացավ 3 միավոր վաստակել, սակայն ավելին անել չհաջողվեց։

Հայ մարզիկը պահպանում է մեդալային հույսերը։ Կուդիևի եզրափակիչ դուրս գալու դեպքում, Թևանյանը կանցկացնի սփոփիչ գոտեմարտ ու կպայքարի բրոնզե մեդալի համար։ Տաջիկստանը ներկայացնող մարզիկը 1/8 եզրափակչում կմրցի ուզբեկ Ումիդջոն Ջալոլովի հետ։

Հիշեցնենք, որ այսօր երեկոյան բրոնզե մեդալի համար է պայքարելու նաև 57 կգ քաշայի Արսեն Հարությունյանը։

Մեր մյուս ներկայացուցիչներից Արման Անդրեասյանը, Հրայր Ալիխանյանն ու Մանվել Խնձրցյանը մնացել են առանց մեդալի։

Ըմբշամարտի աշխարհի առաջնությունում հայ մարզիկների ելույթների ուղիղ թարմացումներին հետևեք մեր տելեգրամյան ալիքում։