Զախարյանը Եվրոպա լիգայում նորամուտի խաղում գոլային փոխանցում է կատարել

«Ռեալ Սոսյեդադի» 21-ամյա կիսապաշտպան Արսեն Զախարյանը Եվրոպա լիգայի փլեյ-օֆֆի` «Միդտյուլանդի» դեմ պատասխան խաղի 83-րդ րոպեին փոխարինման մտնելուց հետո գոլային փոխանցում է կատարել։

Հանդիպումն ավարտվել է իսպանական թիմի՝ 5։2 հաշվով ջախջախիչ հաղթանակով: Զախարյանի փոխանցումից հետո բասկերի իսլանդացի հարձակվող Օրի Օսկարսոնը խփել է իր թիմի 5-րդ գոլը։

Այսպիսով, սա Զախարյանի առաջին արդյունավետ գործողությունն է 2024 թվականի մարտի 31-ից  վեր, երբ Արսենը գոլային փոխանցում էր կատարել «Ալավեսի» հետ Լա լիգայի 30-րդ տուրի խաղում (1:0):

«Զախարյանը ցանկանում է խաղալ: Ես երջանիկ եմ, քանի որ նա գոլային փոխանցում կատարեց Օրիին: Երկուսից էլ գոհ եմ, բայց հատկապես Զախարյանից, քանի որ նա ապաքինվում է երկարատև վնասվածքից, և վստահ եմ, որ այս րոպեները լավ ազդեցություն կունենան նրա վրա»,- խաղից հետո ասել է «Ռեալ Սոսյեդադի» գլխավոր մարզիչ Իմանոլ Ալգուասիլը: