Ըմբշամարտի ԱԱ․ Հրաչյա Պողոսյանը՝ բրոնզե մեդալակիր

Զագրեբում ընթացող ըմբշամարտի աշխարհի առաջնության հունահռոմեական ոճի 60 կգ քաշային կարգում Հրաչյա Պողոսյանը դարձել է բրոնզե մեդալակիր։

Պողոսյանը բրոնզե մեդալը վիճարկում էր Սերբիան ներկայացնող Գեորգի Տիբալովի հետ։

Հիշեցնենք, որ հայ ըմբիշը պայքարը սկսել էր որակավորման փուլից, որտեղ 9։0 հաշվով հաղթել էր Ուկրաինան ներկայացնող Վլադիսլավ Կուզկոյին։ 1/8-ում Պողոսյանը զիջեց ուզբեկ Ալիշեր Գանիևին։ Վերջինս հասավ եզրափակիչ, ինչը հայ մարզիկին տվեց սփոփիչ գոտեմարտեր անցկացնելու հնարավորություն։

Սփոփիչ գոտեմարտում Պողոսյանի մրցակիցը Ադրբեջանը ներկայացնող Նիհադ Մամադլին էր, որը չներկայացավ գոտեմարտին՝ վնասվածքի պատճառով։

Հիշեցնենք, որ Հայաստանի ներկայացուցիչներից 77 կգ քաշային կարգում աշխարհի չեմպիոն էր հռչակվել Մալխաս Ամոյանը։

Ավելի վաղ պայքարը լքել էին 55 կգ քաշային Մանվել Խաչատրյանը, 63 կգ քաշային Կարեն Ասլանյանը, 72 կգ քաշային Գոռ Խաչատրյանը, 82 կգ քաշային Սամվել Գրիգորյանը, 87 կգ քաշային Վիգեն Նազարյանը, 97 կգ քաշային Արթուր Ալեքսանյանն ու 130 կգ քաշային Ռազմիկ Քուրդյանը։

Վաղը սփոփիչ գոտեմարտեր կանցկացնի ու բրոնզե մեդալի համար կպայքարի 67 կգ քաշային Սլավիկ Գալստյանը։

Ըմբշամարտի աշխարհի առաջնությունում հայ մարզիկների ելույթների ուղիղ թարմացումներին հետևեք մեր տելեգրամյան ալիքում։