Սլավիկ Գալստյանը՝ աշխարհի բրոնզե մեդալակիր

Զագրեբում ընթացող հունահռոմեական ոճի ըմբշամարտի աշխարհի առաջնության մրցումային վերջին օրը Հայաստանի ներկայացուցիչ, 67 կգ քաշային, Սլավիկ Գալստյանը նվաճեց բրոնզե մեդալ։

Այդ մեդալի համար նա պայքարում էր Ղրղզստանը ներկայացնող Ռազզակ Բեիշեկեևի հետ ու 1-ին կեսում զիջելով 1։5 հաշվով, հաղթանակի հասավ 15։5 հաշվով նվաճելով Հայաստանի համար 3-րդ մեդալը։

Այսպիսով, ավարտվում է ըմբշամարտի աշխարհի առաջնությունը, որտեղ մեր հունահռոմեականները նվաճում են 1 ոսկե ու 2 բրոնզե մեդալ։ 77 կգ քաշային կարգում աշխարհի չեմպիոն էր հռչակվել Մալխաս Ամոյանը, իսկ 60 կգ քաշային կարգում պատվոհարթակի 3-րդ աստիճանին էր կանգնել 60 կգ քաշային Հրաչյա Պողոսյանը։

Հունահռոմեական ոճում Հայաստանը ներկայացնում էին նաև 55 կգ քաշային Մանվել Խաչատրյանը, 63 կգ քաշային Կարեն Ասլանյանը, 72 կգ քաշային Գոռ Խաչատրյանը, 87 կգ քաշային Վիգեն Նազարյանը, 97 կգ քաշային Արթուր Ալեքսանյանը, 130 կգ քաշային Ռազմիկ Քուրդյանը։

Հիշեցնենք, որ ավելի վաղ ազատ ոճի Հայաստանը հավաքականը նվաճել էր 1 բրոնզե մեդալ։ Պատվոհարթակին կանգնել էր 57 կգ քաշային Արսեն Հարությունյանը։