Հույս ունեմ, որ վաղը խաղից հետո բոլորս երջանիկ կվերադառնանք տուն․ Սանդր Պենրկովիչ

Կոնֆերենցիաների լիգայի հիմնական փուլի 1-ին տուրի «Նոա»-«Ռիեկա» խաղից առաջ երևանյան ակումբի գլխավոր մարզիչ Սանդրո Պերկովիչը պատասխանել է լրագրողների հարցերին․

«Ես իմ նախորդ ակումբի հետ մրցել եմ «Ռիեկայի» դեմ, բայց վաղվա խաղի համար դա նշանակություն չունի։ Եթե մենք ցանկանում ենք հաղթել, իսկ մենք ցանկանում ենք հաղթել, մենք պետք է լինենք մեր լավագույն վիճակում ու մնանք հավատարիմ մեր ծրագրին՝ առաջինից մինչև վերջին վայրկյանը։ Ամենակարևորն այն է, որ խաղադաշտում գտնվող բոլոր ֆուտբոլիստները խիզախություն ցուցաբերեն։ Այս հոգեբանությամբ ու մտածողությամբ մենք ի վիճակի կլինենք նրանց հաղթել»։

«Սնահավատություն չունեմ կապված մարզադաշտի հետ։ Շատ եմ հավանում «Հանրապետական» մարզադաշտը։ Այն իրական ֆուտբոլային մարզադաշտ է, որը ունի պատմություն ու էներգիա է փոխանցում։ Լսել եմ, որ վաղը շատ մարդիկ են գալու մարզադաշտ, հուսով եմ, նրանք կլինեն մեր 12-րդ խաղացողը։ Հույս ունեմ, որ վաղը խաղից հետո բոլորս երջանիկ կվերադառնանք տուն»։

Մանրամասն տեսանյութում․



Հիշեցնենք, որ «Նոա»-«Ռիեկա» հանդիպումը կկայանա հոկտեմբերի 2-ին՝ Վազգեն Սարգսյանի անվան «Հանրապետական» մարզադաշտում։ Մեկնարկը՝ 20։45-ին։