Արարատ-Արմենիան դժվարին հաղթանակ տարավ ԲԿՄԱ-ի նկատմամբ

Fastex Պրեմիեր լիգայի 11-րդ տուրում «Արարատ-Արմենիան» ընդունել էր ԲԿՄԱ-ին ու հասավ կամային հաղթանակի՝ 2։1 հաշվով։

17-րդ րոպեին Խոսե Ջունիոր Բուենոն գրավեց սեփական դարպասը։ 2-րդ կեսի մեկնարկից 1 րոպե անց ինքնագոլի հեղինակ դարձավ Արգիշտի Պետրոսյանը, իսկ խաղավարտից 4 րոպե առաջ Փոլ Այոնգոն ձևակերպեց վերջնական հաշիվը՝ 3 միավոր նվիրելով «Արարատ-Արմենիային»։

Այս հաղթանակից հետո Մանուել Տուլիպայի գլխավորած թիմը 24 միավորով 2-րդ տեղում է։

Հիշեցնենք, որ տուրի մյուս խաղերում «Ալաշկերտը» նվազագույն հաշվով հաղթել էր «Վանին», «Ուրարտուն» 5 անպատասխան գնդակ էր ուղարկել «Շիրակի» դարպասը, իսկ «Փյունիկը» 2։0 հաշվով առավելության էր հասել «Գանձասարի» նկատմամբ։ Տուրը կեզրափակվի «Արարատ»-«Նոա» խաղով։