Լեգիան ու Սլովանը պարտվեցին հերթական տուրում․ Ցրվենա Զվեզդան 1-ին հաղթանակը տարավ ԵԼ-ում (տեսայնութ)

Հայաստանի ազգային հավաքականի ֆուտբոլիստներ Նաիր Տիկնիզյանն ու Տիգրան Բարսեղյանն իրենց ակումբների կազմում մասնակցեցին եվրագավաթային հերթական հանդիպումներին։

Եվրոպա լիգայի հիմնական փուլի 4-րդ տուրում «Ցրվենա Զվեզդան» ընդունել էր «Լիլին» ու հաղթեց նվազագույն հաշվով։ Հայաստանի ազգային հավաքականի պաշտպան Նաիր Տիկնիզյանն ընդգրկված էր սերբական ակումբի մեկնարկային կազմում ու մասնակցեց ամբողջ հանդիպմանը, իսկ «Ցրվենա Զվեզդան» հաղթեց նվազագույն հաշվով՝ Մարկո Արնաուտովիչի 85-րդ րոպեին իրացրած դիպուկ 11-մետրանոցի շնորհիվ։

Այս հաղթանակից հետո «Ցրվենա Զվեզդան» 4 միավորով 25-րդ տեղում է ու հաջորդ տուրերում կմրցի ՖԱՍԲ-ի, «Շտուրմ Գրացի», «Մալմյոյի» ու «Սելտայի» հետ։

Կոնֆերենցիաների լիգայի հիմնական փուլի 3-րդ տուրում էլ Բրատիսլավայի «Սլովանը» հյուրընկալվել էր ֆիննական ԿուՊՍ-ին ու զիջեց 1։3 հաշվով։ Ազգային ընտրանու կիսապաշտպան Տիգրան Բարսեղյանը (որը որակազրկված է ու չի օգնի հավաքականին առաջիկա 3 պաշտնական հանդիպումների ընթացքում) ընդգրկված էր Սլովակիայի չեմպիոնի մեկնարկային կազմում, բայց փոխարինվեց 65-րդ րոպեին։ 

«Սլովանը» միավոր չունի ու 34-րդ տեղում է։ Առաջիկա տուրերի ընթացքում Բարսեղյանն ու թիմակիցները կմրցեն «Ռայո Վալեկանոյի», «Սամսունսփորի» ու «Հակենի» հետ։

Լեհաստանի գավաթակիր «Լեգիան» էլ, նույն մրցաշարում 1։2 հաշվով զիջեց «Ցելյեին»։ Վահան Բիչախչյանը բացակայում էր «Լեգիայի» հայտացուցակից։ Լեհական թիմը 3 միավորով մրցաշարային աղյուսակի 25-րդ տեղում է ու հաջորդ տուրերի ընթացքում կմրցի «Սպարտա Պրահայի», «Նոայի» ու «Լինքոլն Ռեդ Իմփսի» հետ։