Ձմեռային դադարից հետո վերսկսվել է Fastex Հայաստանի Պրեմիեր Լիգան: Առաջին խաղում «Նոան» «Ջունիոր Սպորտ» մարզադաշտում այսօր հյուրընկալվել է «Վեստ Արմենիայի» կողմից և 4:0 հաշվով վստահ հաղթանակ է տարել մրցակցի նկատմամբ:
Հանդիպման հաշիվը 11-րդ րոպեին բացել է Էրալդո Չինարին: Ալբանացի հարձակվողը Գուդմունդուր Թորարինսոնի՝ եզրից կատարած փոխանցումից հետո դարձել է գոլի հեղինակ: 40-րդ րոպեին «Նոայի» և Հայաստանի ազգային հավաքականի կիսապաշտպան Արտակ Դաշյանը կրկնապատկել է իր թիմի առավելությունը: Սա Դաշյանի 50-րդ գոլն էր Հայաստանի առաջնությունում:
Հանդիպման միջնամասում Գոնսալո Գրեգորիոն անվրեպ է իրացրել 11-մետրանոցը և բարձրացել Fastex Պրեմիեր Լիգայի ռմբարկուների աղյուսակի առաջին հորիզոնական, իսկ 64-րդ րոպեին Չինարին դուբլ է ձևակերպել՝ 4:0:
Հատկանշական է, որ 58-րդ րոպեից տանտերերը խաղացել են 10 հոգով. 19-ամյա ճամայկացի պաշտպան Ռոմեյն Բլեյքը, երկրորդ դեղին քարտը ստանալով, հեռացվել է խաղադաշտից:
Այս հաղթանակից հետո «Նոան» 43 միավորով գլխավորում է առաջնության մրցաշարային աղյուսակը: «Վեստ Արմենիան» 17 միավորով 8-րդ տեղում է:
