Հուսով եմ՝ իմ պատմությունը կօգնի շարունակել հավատալ ու երազել. Մխիթարյանը դիմել է երկրպագուներին
Փետրվարի 7-ին տեղի կունենա Հայաստանի հավաքականի նախկին ավագ, ազգային թիմի պատմության լավագույն ռմբարկու Հենրիխ Մխիթարյանի՝ «Իմ կյանքը՝ միշտ կենտրոնում», գրքի շնորհանդեսը։
«Սիրելի հայրենակիցներ, երկրպագուներ և ընթերցողներ, շուտով լույս է տեսնելու իմ գրքի հայերեն հրատարակությունը, որը ինձ համար առանձնահատուկ նշանակություն ունի։ Գրքում փորձել եմ անկեղծորեն խոսել ոչ միայն հաջողությունների, այլև դժվար պահերի մասին, այն մասին, թե ինչ է նշանակում չհանձնվել, մնալ մարդ և պատասխանատվություն կրել, թե՛ քո մասնագիտության, թե՛ երկրի, թե՛ քո անունի առաջ։
Շնորհակալ եմ բոլորիդ աջակցության, հավատարմության և ընթերցելու համար։ Հուսով եմ՝ իմ պատմությունը կոգևորի շատերին և կօգնի շարունակել հավատալ ու երազել»,- դիմելով երկրպագուներին՝ ասել է Մխիթարյանը:
Միջոցառումը տեղի կունենա Newmag Winterfest-ի ընթացքում՝ Dvin Music Hall-ում: Մուտքն ազատ է:
Հենրիխ Մխիթարյանի «Իմ կյանքը՝ միշտ կենտրոնում» գիրքը լույս է տեսել 2025-ին։ Ամիսներ անց Newmag-ը հուշագրությունը ներկայացնում է հայերեն։ Գիրքը Մխիթարյանը գրել է Ալեսանդրո Ալչատոյի հետ գործակցությամբ։ Այն արդեն դարձել է համաշխարհային բեսթսելլեր։ Իտալերենից հայերեն թարգամնել են Լուսինե Շուքուրյանը, Անի Հակոբյանը։
Հայաստանի ֆուտբոլի ազգային հավաքականի բոլոր ժամանակների լավագույն ռմբարկուն ու նախկին ավագը 2022-ից հանդես է գալիս Միլանի «Ինտերում», որի հետ դարձել է Իտալիայի չեմպիոն, նվաճել Սուպերգավաթը, Իտալիայի գավաթը և մասնակցել Չեմպիոնների լիգայի երկու եզրափակիչի։ Հաղթանակների ու դափնիների հետևում՝ անհաջողություններ, վիրավորանքներ ու լուռ պայքար։ Հենց այս ամենը տեղ է գտել գրքում։
