Ինտերը ջախջախեց Պիզային․ Մխիթարյանը՝ գոլի հեղինակ (տեսանյութ)

Իտալիայի առաջնության 22-րդ տուրում «Ինտերն» ընդունել էր «Պիզային» ու ջախջախեց 6։2 հաշվով։

Հանդիպման հաշիվը բացեցին հյուրերը, գոլի հեղինակ դարձավ Ստեֆանո Մորեոն՝ 11-րդ րոպեին։ 23-րդ րոպեին նա դուբլ ձևակերպեց՝ մեծացնելով իր թիմի առավելությունը, սակայն մինչ 1-ին կեսի ավարտը «Ինտերը» կարողացավ հաղթանակի նժարը թեքել իր կողմ։

Նախ, 11-մետրանոցը դիպուկ իրացրեց Պիոտր Զիելինսկին՝ 39-րդ րոպեին, ապա 41-րդ րոպեին Լաուտարո Մարտինեսը վերականգնեց հաշվի հավասարությունը, իսկ 1-ին կեսին ավելացրած 2-րդ րոպեին Ֆրանչեսկո Պիո Էսպոսիտոն առաջ մղեց միլանյան ակումբին։

Հանդերձարանից վերադառնալուց հետո «Ինտերը» մրցակցի դարպասը գրավեց ևս 3 անգամ։ 82-րդ րոպեին աչքի ընկավ Ֆեդերիկո Դիմարկոն, 86-ին՝ Անժ-Յասիմ Բոնին, իսկ հանդիպման վերջակետը դրեց Հայաստանի ազգային հավաքականի լավագույն ռմբարկու Հենրիխ Մխիթարյանը։ Տեսանյութը՝ այստեղ։ Վերջինս ընդգրկված էր տանտերերի մեկնարկային կազմում և մասնակցեց ամբողջ հանդիպմանը։

Մխիթարյանը դարձավ «Ինտերի» կազմում գոլ հեղինակած ամենատարեց 5-րդ ֆուտբոլիստ՝ 37 տարեկան 3 օրական հասակում`շրջանցելով լեգենդար Ջուզեպե Մեացային։ Այս ցանկը գլխավորում է Խավիեր Զանետին՝ 37 տարեկան 4 ամսական 5 օրական։

Սա հայ ֆուտբոլիստի 1-ին գոլն էր ընթացիկ մրցաշրջանում։ Վերջին անգամ Մխիթարյանն գոլի հեղինակ էր դարձել 2024 թվականի հոկտեմբերի 27-ին՝ Իտալիայի առաջնության 9-րդ տուրի «Յուվենտուսի» դեմ խաղում։

Այս հաղթանակից հետո Քրիստիան Կիվուի սաները 52 միավորով գլխավորում են մրցաշարային աղյուսակը։