Խոստացել ենք, որ բարձր ենք պահելու մեր երկրի պատիվը․ Ռուբեն Նազարեթյան

Ֆուտզալի Եվրոպայի առաջնության Հայաստան-Չեխիա (5։4) խաղից հետո Հայաստանի ազգային հավաքականի գլխավոր մարզիչ Ռուբեն Նազարեթյանը խոսել է հանդիպման մասին՝

«Իրոք պատմական նվաճման հասանք։ Ոչ միայն մասնակցեցինք Եվրոպայի առաջնությանը, այլ նաև խմբից դուրս եկանք՝ այն էլ առաջին տեղով։ Դա մեծ նվաճում է մեր համար, բայց մենք չենք կանգնելու ու աշխատելու ենք, որովհետև խոստացել ենք, որ բարձր ենք պահելու մեր երկրի պատիվն ու փորձելու ենք գնալ ինչքան հնարավոր է առաջ։

Երկու կորուստ ունենք Լիտվայի խաղից առաջ՝ Արսեն Պետրոսովն ու Նիկիտա Խրոմիխը։ Կփորձենք քիչ ժամանակ ստացած տղաներին ավելի շատ ժամանակ տալ։ Մենք երբեք դուրս չենք գալիս պարտվելու համար, մենք դուրս ենք գալիս Լիտվային հաղթելու»,-նշել է Նազարեթյանը՝ ՀՖՖ-ին տված հարցազրույցում։

ՈւԵՖԱ-ի հետ զրույցում էլ մասնագետը ասել է, որ սա հիանալի զգացողություն է, լավագույնը՝ վերջին ժամանակներում։

«Հուսով եմ, մենք կշարունակենք ուրախացնել մեր երկրին։ Մենք վստահ ենք մեր ուժերին։ Այս վստահությունը դեռ որակավորման փուլից կար։ Հիմա պատրաստվելու ենք Լիտվայի դեմ հանդիպմանը», - նշել է նա։

Հիշեցնենք, որ չեխերի դեմ տոնած հաղթանակից հետո Հայաստանի հավաքականն ապահովել է խմբում 1-ին հորիզոնականն ու մասնակցությունը քառորդ եզրափակիչին։ 1-ին տուրում Նազարեթյանի գլխավորած ընտրանին հաղթել էր Ուկրաինային՝ 2։1 հաշվով։
 
3-րդ տուրի Լիտվա-Հայաստան հանդիպումը կկայան հունվարի 28-ին և կմեկնարկի 22։30-ին։