Ինտերը հաղթեց Բորուսիային, բայց լավագույն ութնյակում տեղ չգտավ․ Մխիթարյանը մասնակցեց հանդիպմանը

Չեմպիոնների լիգայի հիմնական փուլի վերջին՝ 8-րդ տուրում «Ինտերը» հյուրընկալվել էր Դորտմունդի «Բորուսիային» ու հաղթեց 2։0 հաշվով։

Հայաստանի ազգային հավաքականի նախկին ավագ Հենրիխ Մխիթարյանն ընդգրկված էր հյուրերի մեկնարկային կազմում ու փոխարինվեց 88-րդ րոպեին։

80-րդ րոպեին Մխիթարյանի անհատական անցումից հետո դորտմունդցիների կիսապաշտպան Ֆելիքս Նմեչան խախտեց կանոնները վերջինիս նկատմամբ՝ վտանգավոր դիրքում տուգանային հարվածի իրավունք պարգևելով իտալական գրանդին, որից փայլուն օգտվեց Ֆեդերիկո Դիմարկոն՝ բացելով հանդիպման հաշիվը։ «Ինտերի» առավելությունը կրկնապատկեց Անդի Դիուֆը՝ հիմնական ժամանակին ավելացրած 4-րդ րոպեին։ 

Այս հաղթանակից հետո «Ինտերը» վաստակեց 15 միավոր, որը բավարար չեղավ 1/8 եզրափակիչում հայտնվելու համար։ Քրիստիան Կիվուի գլխավորած թիմը հիմնական փուլն ավարտեց 10-րդ հորիզոնականում՝ վաստակելով անցումային փլեյ-օֆֆի ուղեգիր։ 

Միլանյան ակումբի հավանական մրցակիցներն են պորտուգալական «Բենֆիկան» կամ նորվեգական «Բուդյո-Գլիմտը»։ Անցումային փլեյ-օֆֆի վիճակահանությունը կկայանա հունվարի 30-ին։