Հպարտ եմ իմ երկրով․ Միքայել Ղանդիլյան

Ֆուտզալի Եվրոպայի առաջնության խմբային փուլի վերջին՝ 3-րդ տուրի Հայաստան-Լիտվա (3:3) հանդիպումից հետո Հայաստանի ազգային հավաքականի ֆուտզալիստ Միքայել Ղանդիլյանը խոսել է հանդիպման ու սպասվող քառորդ եզրափակիչի մասին՝

«Հպարտ եմ իմ երկրով։ Ոչ ոք չէր հավատում խմբից մեր դուրս գալուն, չեմ խոսում այն մասին, որ կգրավենք առաջին հորիզոնականը։ Վերջին հանդիպումը բարդ էր հոգեբանական տեսանկյունից, քանի որ ապահովել էինք խմբում առաջին տեղը։ Իհարկե, հեշտ չէ նման խաղերին տրամադրվելը, բայց մենք խաղացինք մինչև վերջ։ Մենք միշտ խաղում ենք հաղթանակի համար։

Խորվաթիան ուժեղ հավաքական է՝ բարձրահասակ ու ֆիզիկապես ամուր խաղացողներով։ Նրանք որոշ նմանություններ ունեն լիտվացիների հետ։ Բարդ է լինելու։ Եվրոպայի առաջնությունում չկան թույլ մրցակիցներ։ Բոլոր թիմերն այստեղ ուժեղ են»,-նշել է Ղանդիլյանը։

Հիշեցնենք, որ Հայաստանի հավաքականն անցկացրած 3 խաղից հետո 7 միավորով գլխավորեց խմբի աղյուսակը՝ դուրս գալով քառորդ եզրափակիչ, որտեղ հունվարի 31-ին կմրցի Խորվաթիայի հավաքականի հետ։

Խմբային փուլի առաջին տուրում Հայաստանը 2։1 հաշվով առավելության էր հասել Ուկրաինայի, 2-րդ տուրում՝ 5։4 հաշվով Չեխիայի նկատմամբ։