Inside. Ռանոսը վարձավճարով հանդես կգա գերմանական մեկ այլ թիմում

Հայաստանի ազգային հավաքականի հարձակվող Հանտ-Լեոն Ռանոսը կարիերան կշարունակի Բունդեսլիգա 2-ը ներկայացնող «Այնտրախտ Բրաունշվայգում»։ Ինչպես հայտնում է գերմանացի ինսայդեր Ֆլորիան Պլետենբերգը, Բրաունշվայգը ներկայացնող ակումբն ու Մյունխենգլադբախի «Բորուսիան» համաձայնության են եկել ֆուտբոլիստի տեղափոխության վերաբերյալ։

22-ամյա հարձակվողը մինչև մրցաշրջանի ավարտը վարձավճարով հանդես կգա նոր թիմում, որպեսզի ավելի շատ խաղաժամանակ ստանա, քանի որ այս մրցաշրջանում «Բորուսիայի» կազմում անցկացրել է ընդամենը 111 րոպե։

Գործարքը չի ներառում հետագա գնման իրավունք։ Հայաստանի ազգային հավաքականի ֆուտբոլիստի պայմանագիրը «Բորուսիայի» հետ ուժի մեջ է մինչև 2027 թվականի հունիսը։

Ընթացիկ մրցաշրջանում Ռանոսը Բունդեսլիգայում մասնակցել է 8 հանդիպման և դարձել է 1 գոլի հեղինակ։