Հայաստանի ազգային հավաքականի պաշտպան Ստյոպա Մկրտչյանը կարիերան կշարունակի Գերմանիայի 2-րդ Բունդեսլիգան ներկայացնող «Նյուրնբերգում»։
Գերմանական ակումբի մամուլի ծառայության հրապարակումը․
«1.92 մետր հասակ ունեցող պաշտպանն իր երիտասարդ տարիներն անցկացրել է հայրենիքում՝ Հայաստանում և 2023 թվականի ամռանը վարձավճարով «Արարատ Արմենիայից» տեղափոխվել է Խորվաթիա։ Խորվաթիայի բարձրագույն լիգայում կես տարվա մրցելույթներից հետո «Օսիյեկը» պաշտպանին ձեռք բերեց ամբողջական տրանսֆերով։ Ընթացիկ մրցաշրջանում Մկրտչյանը Խորվաթիայի առաջնության մրցաշարային աղյուսակի 9-րդ հորիզոնականը զբաղեցնող թիմի կազմում անցկացրել է 17 հանդիպում։ Հայաստանի ազգային հավաքականի 23 անգամ հրավիրված ֆուտբոլիստը ձմեռային տրանսֆերային պատուհանի վերջին օրը մշտական հիմունքներով տեղափոխվում է «Նյուրնբերգ»։
«Նյուրնբերգի» սպորտային տնօրեն Յոտի Խացիալեքսիուին կիսվել է իր տպավորություններով.
«Մեր սկաուտինգային բաժինը խորապես ուսումնասիրել է Ստյոպային և մեծ վստահությամբ առաջարկել նրան, քանի որ նա համապատասխանում է մեր պահանջներին որպես ձախլիկ պաշտպան և իր 1.92 մետր հասակով նաև ունի անհրաժեշտ ֆիզիկական տվյալներ։ Այս տրանսֆերով մենք արձագանքում ենք Օնդրեյ Կարաֆիատի, Թիմ Դրեքսլերի և Ռոբին Կնոխեի հեռանալուն։ Ստյոպայի տեղափոխությամբ համոզված ենք, որ պաշտպանությունում լավ համալրված ենք մրցաշրջանի երկրորդ հատվածի համար և նրան ջերմորեն ողջունում ենք Նյուրնբերգում»,-նշել է նա։
Նոր ակումբի մասին խոսել է նաև ազգային ընտրանու պաշտպանը․
«Ուրախ եմ գերմանական ֆուտբոլ տեղափոխվելու և Բունդեսլիգա 2-ում նոր մարտահրավեր ընդունելու համար։ Շատ երջանիկ եմ, որ տեղափոխությունը «Նյուրնբերգ» կայացավ և անհամբեր սպասում եմ նոր միջավայրին ծանոթանալուն ու «Նյուրնբերգի» երկրպագուների առաջ խաղալուն»,-նշել է պաշտպանը։
«Նյուրնբերգն» ընթացիկ մրցաշրջանում անցկացրած 20 խաղից հետո 26 միավորով 9-րդ տեղում է։
