Արբելոան հայտարարել է, որ Մբապպեն ունի Ռոնալդուի ռեկորդները գերազանցելու հնարավորություն

Մադրիդի «Ռեալի» հարձակվող Կիլիան Մբապպեն այս պահին երկրագնդի լավագույն ֆուտբոլիստն է։ Նման կարծիք է հայտնել «արքայական» ակումբի գլխավոր մարզիչ Ալվարո Արբելոան։

Արբելոայի կարծիքով, ֆրանսիացին ունի ապագայում Կրիշտիանու Ռոնալդուի ցուցանիշը գերազանցելու ներուժը։ Պորտուգալացին «սերուցքայինների» պատմության լավագույն ռմբարկուն է։

«Ինչպես արդեն հայտարարել եմ, Ռոնալդուի նվաճումը թվում էր անգերազանցելի մի բան։ Մբապպեն ունի անցնելու երկար ճանապարհ, Կրիշտիանուն էլ այստեղ էր երկար տարիներ, բայց Մբապպեն ունի բոլոր հնարավորությունները, որ հետևի նրան ու անհայտ է, կկարողանա՞ գերազանցել նրան, բայց եթե ինչ-որ մեկը կարողանա այդ անել, դա կլինի Կիլիանը»,-հայտարարել է իսպանացի մասնագետը։

Մբապպեն «Ռեալի» գույներն է պաշտպանում 2024 թվականից։ Այս պահի դրությամբ նա մասնակցել է 90 հանդիպման` դառնալով 82 գոլի ու 10 գոլային փոխանցման հեղինակ։
Ռոնալդուն էլ մադրիդյան ակումբի կազմում անցկացրած 438 խաղում դարձել էր 450 գոլի ու 131 ասիստի հեղինակ։