Եղիշե Մելիքյանն ու Էդուարդ Սպերցյանը մեկնաբանել են Ազգերի լիգայի վիճակահանության արդյունքները
Բրյուսելում կայացած Ազգերի լիգայի 2026/27 խաղարկության խմբային փուլի վիճակահանության արդյունքներով Հայաստանի ազգային հավաքականն ընդգրկվել է C լիգայի 2-րդ խմբում, որտեղ կմրցի Չեռնոգորիայի, Կիպրոսի ու Լատվիա/Ջիբրալթար զույգի հաղթողի հետ։
Ազգային ընտրանու գլխավոր մարզիչ Եղիշե Մելիքյանը մեկնաբանել է վիճակահանության արդյունքները․
«Գոհ ենք վիճակահանությունից։ Պետք է լավ պատրաստվենք, այսօր ֆուտբոլում հեշտ մրցակիցներ չկան, և մեր խմբում էլ բոլոր թիմերը վտանգավոր են։ Առջևում ընկերական խաղեր են, պետք է պատրաստվենք ու փորձենք անել առավելագույնը։ Ֆուտբոլում կարևորը վստահությունն է, որը մենք զգում ենք», - նշել է Մելիքյանը։
Վիճակահանության մասին կարծիք է հայտնել նաև ազգային հավաքականի ավագ Էդուարդ Սպերցյանը․
«Անհամբեր սպասում ենք պաշտոնական խաղերին։ Առաջիկայում ընկերական հանդիպումներ են, որոնց միջոցով էլ կսկսենք նախապատրաստվել։ Մեր նպատակը լավ պատրաստվելը և խմբում առաջին տեղը զբաղեցնել է։ Հետաքրքիր խաղեր են լինելու», - ասել է Սպերցյանը։
Նշենք, որ մինչև Ազգերի լիգայի խաղարկության մեկնարկը Հայաստանի հավաքականը մարտին կանցկացնի 2 ընկերական հանդիպում՝ Բելառուսի ու ԱՄԷ-ի հավաքականների հետ։
Ազգերի լիգայի 1-ին տուրի հանդիպումները կկայանան սեպտեմբերի 24-26-ը։
