Նոթինգհեմ Ֆորեստի նախկին սեփականատիրոջ տան վրա հարձակման ու կողոպուտի փորձ է կատարվել

Անգլիական «Նոթինգհեմ Ֆորեստի» նախկին սեփականատեր Ֆավազ Ալ-Հասավին դանակահարվել է Լոնդոնի կենտրոնական շրջանում գտնվող իր տանը տեղի ունեցած կողոպուտի փորձի ժամանակ։ Այս մասին հայտնում է The Sun-ը։

Աղբյուրի փոխանցմամբ՝ չարագործները ներխուժել են գործարարի ննջասենյակ այն պահին, երբ նա քնած է եղել։ Հարձակման ընթացքում տղամարդուն դանակի հարվածներ են հասցվել պարանոցի և ձեռքի շրջանում։

Հանցագործները դեպքի վայրից դիմել են փախուստի։ Այս պահին հայտնի չէ՝ արդյոք նրանց հաջողվե՞լ է հափշտակել արժեքավոր գույք։ Համացանցում հրապարակվել են լուսանկարներ, որոնցում տուժածը հիվանդանոցային մահճակալին է՝ վիրակապերով։

Ալ-Հասավիի փաստաբանները հայտնել են, որ նրա կյանքին վտանգ չի սպառնում, իսկ ստացած վնասվածքները ծանր հետևանքներ չեն առաջացնի առողջության համար։ Իրավապահ մարմինները շարունակում են դեպքի առթիվ քննությունը։

Հիշեցնենք, որ քուվեյթցի գործարարը անգլիական ակումբը ձեռք էր բերել 2012 թվականին, իսկ հինգ տարի անց բաժնետոմսերի փաթեթը վերավաճառել էր հույն գործարար Էվանգելոս Մարինակիսին։