Ինտեր-Յուվենտուս հանդիպման մրցավարը կարող է որակազրկվել մինչև 1 ամսով

Իտալացի մրցավար Ֆեդերիկո Լա Պեննան կարող է որակազրկվել Իտալիայի առաջնության 25-րդ տուրի «Ինտեր»-«Յուվենտուս» (3:2) հանդիպման ընթացքում թույլ տված սխալի համար։

Մրցավարը 42-րդ րոպեին երկրորդ դեղին քարտը ցույց տալով հեռացրել էր թուրինյան ակումբի պաշտպան Պիեր Կալուլուին՝ «Ինտերի» պաշտպան Ալեսանդրո Բաստոնիի սիմուլյացիայից հետո։

Ինչպես հայտնում է La Gazzetta dello Sport-ը, Ա Սերիայի մրցավարական մարմինները Բաստոնիի սիմուլյացիայից գրեթե նույնքան զայրացած են եղել, որքան ֆրանսիացի ֆուտբոլիստին երկրորդ դեղին քարտ ցույց տալու դրվագից։

Ենթադրվում է, որ Լա Պեննան կորակազրկվի երկու-երեք շաբաթով, սակայն չի բացառվում, որ մրցավարը զրկվի հանդիպումներ սպասարկելու հնարավորությունից նույնիսկ 1 ամսով։ Միաժամանակ նշվում է, որ չնայած թույլ տված սխալին, մրցավարը հանդիպման երկրորդ խաղակեսում գործել է բարձր մակարդակով։

Նշենք, որ մրցավարական կոպիտ սխալն արժանացել էր «Յուվենտուսի» գլխավոր մարզիչ Լուչիանո Սպալլետիի և ակումբի տնօրեններ Դամիեն Կոմոլլիի ու Ջորջիո Կիելինիի բուռն արձագանքին, որոնք ընդմիջմանը բախվել էին մրցավարի հետ։