Ինտեր-Յուվենտուս խաղի ընդմիջմանը Սպալլետին, Կիելինին ու Կոմոլլին բախվել են մրցավարի հետ (տեսանյութ)

Իտալիայի առաջնության 25-րդ տուրի «Ինտեր» – «Յուվենտուս» (3:2) հանդիպման ընթացքում թուրինյան ակումբի ներկայացուցիչները դժգոհություն են հայտնել մրցավարական որոշումներից։

«Յուվենտուսի» գլխավոր մարզիչ Լուչիանո Սպալլետին ու թիմի մարզչական շտաբը ընդմիջման ժամանակ բողոքել են մրցավարի գործողություններից՝ բախվելով խաղը սպասարկող անձնակազմի հետ։ Տեղի ունեցած միջադեպին մասնակցել են նաև ակումբի տնօրեններ Դամիեն Կոմոլլին ու Ջորջիո Կիելինին։

Դժգոհության պատճառը եղել է առաջին խաղակեսի վերջնամասում կայացված որոշումը, որի արդյունքում հեռացվել է «Յուվենտուսի» պաշտպան Պիեր Կալուլուն։

«Այսօր տեղի ունեցածից հետո ֆուտբոլի մասին խոսել հնարավոր չէ։ Տեղի ունեցավ մի բան, որը լիովին անընդունելի է՝ անկախ նրանից՝ դա մեզ հետ է պատահել, թե որևէ այլ թիմի։ Հավանաբար արդեն վաղվանից VAR համակարգը պետք է փոփոխությունների ենթարկվի, որովհետև անթույլատրելի է, որ նման կարևոր հանդիպումներում այսքան սխալներ կրկնվեն։

Մրցաշրջանի հենց սկզբից մենք փորձում էինք բոլորին փոխանցել, որ մրցավարության մակարդակը չի համապատասխանում պահանջներին։ Ցավոք, այսօր դա ցույց տվեցինք ողջ աշխարհին։ Այս մրցաշրջանում նման իրավիճակներ եղել են բազմաթիվ թիմերի հետ։ Մենք պետք է փոփոխություններ կատարենք, այլևս չենք կարող ամեն ինչ հետաձգել, ինչպես դա հաճախ տեղի է ունենում իտալական ֆուտբոլում»,-նշել է Կիելինին։

Հիշեցնենք, որ հանդիպման գլխավոր մրցավարը Ֆեդերիկո Լա Պեննան էր։