Ատլետիկոն խոշոր հաշվով պարտվեց․ Մենք կորցրինք Լա Լիգայում հաղթելու շանսերը․ Օբլակ

Իսպանիայի առաջնության 24-րդ տուրում Մադրիդի «Ատլետիկոն» հյուրընկալվել էր «Ռայո Վալյեկանոյին» ու զիջեց 0։3 հաշվով։

Մադրիդցիները Լա Լիգայի 3-րդ խաղում անընդմեջ չեն կարողանում գրավել մրցակցի դարպասը։

Մադրիդյան ակումբի դարպասապահ Յան Օբլակը մեկնաբանել է պարտությունը․

«Մենք պարտվեցինք Լա Լիգայում։ Այժմ այլևս չենք կարող պայքարել չեմպիոնության համար և արժանի էինք այս պարտությանը»,- Օբլակի խոսքը մեջբերում է El Chiringuito-ն։

Իր հերթին պարտությունը մեկնաբանել է թիմի գլխավոր մարզիչ Դիեգո Սիմեոնեն, նշելով, որ համաձայն չէ Օբլակի տեսակետի հետ։

«Ես համաձայն չեմ Օբլակի կարծիքի հետ։ Թիմն արեց այն ամենը, ինչ կարող էր, բայց մրցակիցն ավելի լավն էր։ Նրանց չենք կարող քննադատել։ Հիմա պետք է մտածենք, թե ինչ պետք է անենք չորեքշաբթի»,-նշել է Սիմեոնեն։

24 խաղից հետո «Ատլետիկոն» ունի 45 միավոր և զբաղեցնում է մրցաշարային աղյուսակի 3-րդ հորիզոնականը։ «Ռայո Վալյեկանոն» 23 խաղից հետո վաստակել է 25 միավոր և գտնվում է 16-րդ տեղում։ Առաջատարը Մադրիդի «Ռեալն» է՝ 60 միավորով։

Հաջորդ տուրում «Ատլետիկոն», փետրվարի 21-ին, սեփական հարկի տակ կընդունի «Էսպանյոլին»։