Մոուրինյու. «Մրցավարի մոտ գրված էր՝ Չուամենին, Հաուսենը և Կարերասը չեն կարող քարտ ստանալ»
«Բենֆիկայի» գլխավոր մարզիչ Ժոզե Մոուրինյուն մեկնաբանել է իր կարմիր քարտը Մադրիդի «Ռեալի» դեմ Չեմպիոնների լիգայի անցումային փլեյ-օֆֆի խաղում (0:1):
«Ինձ հեռացրին, որովհետև ասացի մի բան, որն ակնհայտ էր: Մրցավարն ուներ թերթիկ, որի վրա գրված էր՝ Չուամենին, Հաուսենը և Կարերասը չեն կարող դեղին քարտ ստանալ (հակառակ դեպքում բաց կթողնեին պատասխան հանդիպումը): Ես պահեստայինների նստարանին անցկացրել եմ 1400 հանդիպում և գիտեի՝ ֆուտբոլում ում կարելի է քարտ ցույց տալ, իսկ ում՝ ոչ: Մենք գիտենք՝ ինչպես է դա աշխատում: Ամեն դեպքում, «Ռեալը» արժանի էր հաղթանակի:
Մադրիդում ես չեմ լինի պահեստայինների նստարանին, չեմ կարողանա մտնել հանդերձարան, շփվել թիմի հետ, ինձ համար դժվար է, բայց օգնականներս պատրաստ կլինեն»,- ասել է պորտուգալացին Movistar-ի հետ զրույցում:
Մոուրինյուի հեռացումը եղել է հանդիպման 85-րդ րոպեին, երբ «Ռեալի» վինգեր Վինիսիուս Ժունիորը հետևից հարվածել է «Բենֆիկայի» կիսապաշտպան Ռիչարդ Ռիոսին՝ մադրիդցիների տուգանային հրապարակի մատույցներում: Մրցավար Ֆրանսուա Լետեքսիեն բրազիլացուն քարտ ցույց չի տվել, որը երկրորդը կլիներ Վինիսիուսի համար:
Այդ խախտումից հետո Մոուրինյուն վազել է դեպի չորրորդ պաշտոնյան և սկսել բողոքել: Դրա համար նա զգուշացվել է, որից հետո անմիջապես ինչ-որ բան ասել մրցավարին և ստացել երկրորդ դեղինը:
