Կվազեմ ամբողջ Երևանով, եթե հաղթենք ԱԶ Ալկմարին դիմակայությունում․ Նոայի գլխավոր մարզիչ

Կոնֆերենցիաների լիգայի անցումային փլեյ-օֆֆի առաջին խաղում «Նոան» Երևանի Վազգեն Սարգսյանի անվան «Հանրապետական» մարզադաշտում կմրցի Նիդեռլանդների «ԱԶ Ալկմարի» հետ։ Այսօր կայացել է երևանյան թիմի գլխավոր մարզիչ Սանդրո Պերկովիչի նախախաղային ասուլիսը։

Հիշեցնենք, որ ասուլիսին մասնակցել է նաև թիմի կիսապաշտպան Հովհաննես Հարությունյանը։

Ասուլիսի ընթացքում հնչել է նաև հետևյալ հարցը․

-«ԱԶ Ալկմարը» համարվում է ֆավորիտ, սա Ձեզ համար ճնշու՞մ է։ Երբ Մոուրինյոն «Պորտուի» հետ նվաճեց ՉԼ-ն՝ վազեց ամբողջ մարզադաշտով։ Հայկական ֆուտբոլի համար փոքր նվաճում չի լինի դուրս գալ եվրագավաթային մրցաշարի 1/8։ Եթե հաջողվի հաղթահարել փլեյ-օֆֆը՝ ինչպես կնշեք ձեր հաղթանակը։

-Կվազեմ ամբողջ Երևանով, ոչ թե միայն խաղադաշտով (ծիծաղում է)։ Անձամբ ես շատ եմ հարգում մեր մրցակցին։ Ունեն աշխարհում լավագույն ակադեմիաներից մեկը, իրենց երիաստարդական թիմը հաղթել է Չեմպիոնների լիգան։ Մեզ համար լավ հնարավորություն է փորձարկելու մեզ ու տեսնել թե ինչքան լավն ենք մենք։ Համաձայն եմ՝ նրանք ֆավորիտ են, բայց ֆուտբոլի մեջ կարևոր է եռանդուն աշխատանքն ու 90 րոպեն խաղադաշտում,—ասել է Պերկովիչը։