Ֆրանկոֆոնիայի խաղերին ընդառաջ աթլետիկական նոր ենթակառուցվածք պետք է ձևավորենք Երևանում. Ժաննա Անդրեասյան
ՀՀ կրթության, գիտության, մշակույթի և սպորտի նախարար Ժաննա Անդրեասյանը Սպորտային հրաձգության Եվրոպայի առաջնությանն ընդառաջ հրավիրված մամուլի ասուլիսի ընթացքում անդրադարձել է Կառավարության՝ մարզական խոշոր միջազգային մրցաշարեր հյուրընկալելու քաղաքանությանը:
2027 թվականին Հայաստանը կհյուրընկալի Ծանրամարտի աշխարհի առաջնությունը, Ֆրանկոֆոնիայի 10-րդ մարզամշակութային խաղերը, ինչպես նաև այլ մրցաշարեր:Ժաննա Անդրեասյանի խոսքով՝ Ֆրանկոֆոնիայի խաղերին ընդառաջ աթլետիկական նոր ենթակառուցվածք պետք է ձևավորվի:
«Ծանրամարտի առաջնությունը կազմակերպելու ենք՝ հիմնվելով Եվրոպայի առաջնության փորձի վրա։ Սա մեզ համար չափազանց կարևոր և ուսանելի փորձ էր։ Ինչ վերաբերում է Սպորտային մարմնամարզության Եվրոպայի առաջնությանը, ապա նախատեսվում է մեծ ծավալի գույքի ձեռքբերում, որը հետագայում կկարողանա ծառայել նաև մարմնամարզության այլ միջազգային մրցաշարեր և առաջնություններ հյուրընկալելու նպատակին։ Այժմ էլ ընթանում է Ալբերտ Ազարյանի անվան մարզադպրոցի կառուցումը, որը Եվրոպայի առաջնությանը պետք է ծառային որպես մարզումային համալիր: Ֆրանկոֆոնիայի խաղերը մեզ համար նույնպես շատ կարևոր են, հատկապես՝ աթլետիկայի տեսանկյունից։ Պետք է ձևավորենք ամբողջությամբ նոր ենթակառուցվածք, որը հետագայում ևս կօգտագործվի այլ մրցաշարերի ընթացքում»,- ասել է Ժաննա Անդրեասյանը:
Այս համատեքստում ԿԳՄՍ նախարարին հարց է ուղղվել «Սպարտակ» մարզադաշտի վերաբերյալ:
«Կան բազմաթիվ հարցեր, այդ թվում՝ իրավական բնույթի։ Ներկայում Քաղաքաշինության կոմիտեի մեր գործընկերները համապատասխան ուսումնասիրություններ են իրականացնում, որոնք մարտ ամսվա ընթացքում կպարզեցնեն մեր հետագա անելիքները։ Սակայն մեր ծրագրերը հստակ են․ մենք պետք է ձևավորենք անհրաժեշտ ենթակառուցվածքը, և խոսքը վերաբերում է հենց Երևանին»,- նշել է Ժաննա Անդրեասյանը:
