Ինտերն արժանի էր Նորվեգիայում պարտվելուն, բայց մենք կարող ենք շտկել իրավիճակը․ Քրիստիան Կիվու

Չեմպիոնների լիգայի անցումային փլեյ-օֆֆի «Բուդյո-Գլիմտի» դեմ պատասխան խաղից առաջ «Ինտերի» գլխավոր մարզիչ Քրիստիան Կիվուն նշել է, որ իր թիմը պատրաստ է շտկել իրավիճակը։

Հանդիպումը, որի հաղթողը կանցնի 1/8 եզրափակիչ, կկայանա երեքշաբթի (00։00)՝ Միլանում։ Առաջին խաղում միլանյան թիմը պարտվել էր 1:3 հաշվով։

Կիվուն նշել է, որ «Ինտերը» խաղին մոտենում է նույն հանգստությամբ և պատրաստվածությամբ, ինչ մրցաշրջանի սկզբում էր։ Նրա խոսքով՝ թիմը միշտ խաղադաշտ է դուրս գալիս հաղթելու համար և լրացուցիչ ճնշման կարիք չկա։ Միևնույն ժամանակ, նա ընդգծել է, որ կարևոր է պահպանել հավասարակշռությունը, քանի որ նորվեգական ակումբը վտանգավոր է արագ հակագրոհների ժամանակ։

Մարզիչը խոստովանել է, որ առաջին խաղից հետո թիմում մեծ հիասթափություն էր և «Ինտերը» արժանի էր այդ պարտությանը։ Սակայն այժմ ամբողջ ուշադրությունը կենտրոնացած է պատասխան հանդիպման վրա։ Կիվուի խոսքով՝ թիմը պետք է վերալիցքավորվի, սակայն ունի բավարար որակ՝ իրավիճակը շտկելու և դրական արդյունքի հասնելու համար։

Անդրադառնալով այն հանգամանքին, որ «Ինտերը» առաջատար է Իտալիայի առաջնությունում, մասնագետը նշել է, որ թիմը մրցաշրջանի սկզբից շարժվում է խաղ առ խաղ սկզբունքով՝ չմտածելով հաջորդ հանդիպման մասին։ Նա վստահեցրել է, որ ֆուտբոլիստները պատրաստ են թե՛ ֆիզիկապես, թե՛ հոգեբանորեն և կարող են մրցաշրջանի մնացած հատվածը անցկացնել բարձր մակարդակով։