Չեմ սիրում ֆուտբոլ դիտել, 90 րոպեն չափազանց երկար է․ Ռոնալդինյո

«Բարսելոնայի» և Բրազիլիայի հավաքականի նախկին կիսապաշտպան Ռոնալդինյոն խոստովանել է, որ ֆուտբոլային հանդիպումներ դիտելն իրեն հաճույք չի պատճառում։ Ինչպես տեղեկացնում է Marca պարբերականը, բրազիլացին նախընտրում է սահմանափակվել միայն խաղերի կարևոր դրվագներով։

«Ինձ դուր չի գալիս ֆուտբոլ դիտելը։ Ինձ հետաքրքրում են միայն առանցքային պահերը, իսկ 90 րոպեն չափազանց երկար է։ Բացառություն կարող են լինել միայն եզրափակիչները կամ դերբիները... Մնացած բոլոր դեպքերում ինձ համար հետաքրքիր չէ։ Ես սկսում եմ նյարդայնանալ»,- ասել է լեգենդար ֆուտբոլիստը։

Ռոնալդինյոն նաև նշել է, որ խաղերը դիտելիս չի կարողանում զսպել մասնագիտական քննադատությունը. «Մտածում ես՝ ինչպե՞ս կարող էր այս տղան նման փոխանցումը բաց թողնել։ Դա ինձ պարզապես զայրացնում է»։

Այս հայտարարությունը հնչել է Լոս Անջելեսում կայացած «Ռեալի» և «Բարսելոնայի» լեգենդների հանդիպման նախաշեմին, որն ավարտվել է ոչ-ոքի՝ 1:1 հաշվով։ Հիշեցնենք, որ ավելի վաղ Կոստա Ռիկայում կայացած լեգենդների «Էլ Կլասիկոյում» «արքայական» ակումբի վետերանները հաղթել էին 2:0 հաշվով։