Դիկ Ադվոկատը հրաժարական է տվել աշխարհի առաջնության մեկնարկից չորս ամիս առաջ

Դիկ Ադվոկատը Կյուրասաոյի հավաքականին դուրս է բերել երկրի պատմության մեջ առաջին Աշխարհի առաջնության եզրափակիչ փուլ, սակայն չի գլխավորի թիմը մրցաշարում, քանի որ անձնական պատճառներով հրաժարական է տվել։

«Դիկ Ադվոկատն անհապաղ հրաժարական է տվել Կյուրասաոյի ֆուտբոլի ազգային հավաքականի գլխավոր մարզչի պաշտոնից»,- ասված է երկրի ֆուտբոլի ֆեդերացիայի հայտարարության մեջ։

Հաղորդագրության մեջ նաև նշվում է, որ 78-ամյա մասնագետը «իրեն ամբողջությամբ կնվիրի դստերը, ով առողջական խնդիրներ ունի»։

«Ես միշտ ասել եմ, որ ընտանիքն ավելի կարևոր է, քան ֆուտբոլը»,- հավելել է Ադվոկատն իր հայտարարության մեջ։

Նիդերլանդցի մասնագետը երեք անգամ գլխավորել է Նիդերլանդների հավաքականը, իսկ Կյուրասաոյի թիմի ղեկը ստանձնել էր 2024 թվականին: Ադվոկատին կփոխարինի նրա հայրենակից Ֆրեդ Ռյուտենը: Այս մասնագետը նախկինում մարզել է ՊՍՎ-ն, «Անդերլեխտը» և «Ֆեյենորդը»։