Ֆլիկը դադարել է խաղացողներին հեռացնել կազմից ուշանալու համար, բայց այլ պատիժ է մտածել

«Բարսելոնայի» ֆուտբոլիստներ Պեդրին ու Ֆերան Տորեսը պատմել են թիմում կարգապահական պատիժների փոփոխության մասին, որն իրականացվել է գլխավոր մարզիչ Հանսի Ֆլիկի նախաձեռնությամբ:

El Hormiguero հումորային շոուի եթերում իսպանացիները հայտնել են, որ գերմանացի մասնագետը դադարել է խաղացողներին թողնել պահեստայինների նստարանին ցանկացած միջոցառումից ուշանալու համար: Նախկինում այդ պատճառով մեկական անգամ պատժվել են Ռաֆինյան ու Մարկուս Ռեշֆորդը, իսկ Ժյուլ Կունդեն՝ երեք անգամ:

«Ինչ վերաբերում է ճշտապահությանը, մեզ մոտ կանոնները մի փոքր փոխվել են: Եթե ուշանում ես՝ տուգանք ես վճարում»,- ասել է Պեդրին: Ֆերանը հավելել է, որ տուգանքները կարող են հասնել մինչև 40 հազար եվրոյի:

Ֆուտբոլիստները նշել են, որ Ֆլիկն ուշացում է համարում նույնիսկ երեք վայրկյանը: Բացի այդ, խաղացողները հավելել են, որ 61-ամյա գերմանացին չի խանգարում TikTok տեսահոլովակների նկարահանումներին և հանդերձարանի կատակներին: