Ինձ փորձում էին համոզել հանդես գալ Իսպանիայի հավաքականում․ Մեսսի

«Ինտեր Մայամիի» ու Արգենտինայի ազգային հավաքականի 38-ամյա լեգենդար ֆուտբոլիստ Լիոնել Մեսսին պատմել է կարիերայի վաղ փուլում քաղաքացիությունը փոխելու հնարավորության մասին։ Արգենտինացին նշել է, որ Իսպանիայի ֆուտբոլի ֆեդերացիան մեծ հետաքրքրություն է ցուցաբերել իր նկատմամբ և փորձել է համոզել նրան՝ միանալ «Ֆուրիա Ռոխային»։

«Ինչ-որ պահի Իսպանիայի հավաքականը կապ հաստատեց ինձ հետ։ Նրանք փորձում էին համոզել ինձ։ Ես արգենտինացի եմ, թեև «Բարսելոնա» եմ եկել դեռ շատ երիտասարդ տարիքում։ Իսպանիայի կազմում խաղալու հնարավորություն կար, բայց ես միշտ ցանկացել եմ ներկայացնել Արգենտինան»,- Մեսսիի խոսքերն է մեջբերում The Touchline-ը X սոցիալական ցանցում։

Մեսսիի նորամուտը Արգենտինայի հավաքականում տեղի է ունեցել 2005 թվականի օգոստոսի 17-ին՝ Հունգարիայի դեմ խաղում։ Այդ հանդիպումը մտավ պատմության մեջ որպես ամենաանսովոր նորամուտներից մեկը. 64-րդ րոպեին փոխարինման դուրս գալուց ընդամենը մեկ րոպե անց Լեոն հեռացվեց դաշտից՝ մրցակցի կոկորդին հարվածելու համար։ Չնայած նման անհաջող սկզբին՝ Մեսսին դարձավ ալբիսելեստեի պատմության մեծագույն ֆուտբոլիստը՝ հավաքականի կազմում մասնակցելով 196 հանդիպման ու դառնալով 115 գոլի հեղինակ։