ՈւԵՖԱ-ն մերժել է Բենֆիկայի բողոքարկումը. Պրեստիանիին չի մասնակցի Ռեալի դեմ հանդիպմանը
ՈւԵՖԱ-ն ուժի մեջ է թողել «Բենֆիկայի» վինգեր Ջանլուկա Պրեստիանիի որակազրկման որոշումը։ Արգենտինացի ֆուտբոլիստը ստիպված կլինի բաց թողնել Մադրիդի «Ռեալի» դեմ այսօր կայանալիք պատասխան հանդիպումը։
Հիշեցնենք, որ անցած շաբաթ Չեմպիոնների լիգայի անցումային փլեյ-օֆֆի 1-ին խաղում «Ռեալը» նվազագույն՝ 1:0 հաշվով հաղթել էր մրցակցին։ Հանդիպման երկրորդ խաղակեսում մադրիդցիների հարձակվող Վինիսիուս Ջունիորը դիմել էր մրցավար Ֆրանսուա Լետեքսյեին՝ պնդելով, որ Պրեստիանին իրեն «կապիկ» է անվանել՝ խոսելիս բերանը ծածկելով մարզաշապիկով:
Չնայած «արծիվների» ֆուտբոլիստը հետագայում հայտարարել էր, որ բրազիլացու հասցեին ռասիստական վիրավորանքներ չի հնչեցրել, ՈւԵՖԱ-ն որոշում էր կայացրել ժամանակավորապես արգելել նրա մասնակցությունը խաղերին:
««Բենֆիկայի» ներկայացրած բողոքարկումը մերժված է: Հետևաբար, ՈւԵՖԱ-ի Վերահսկողական, էթիկայի և կարգապահական մարմնի 2026 թվականի փետրվարի 23-ի որոշումը մնում է ուժի մեջ: Ջանլուկա Պրեստիանին շարունակում է մնալ ժամանակավորապես որակազրկված և բաց կթողնի ՈւԵՖԱ-ի հովանու ներքո անցկացվող ակումբային մրցաշարերի հաջորդ հանդիպումը»,-նշված է ՈՒԵՖԱ-ի հայտարարության մեջ:
«Ռեալ Մադրիդ»-«Բենֆիկա» հանդիպումը կմեկնարկի ուղիղ կեսգիշերին։
