Ֆիլիպե Կոուտինյոն, ամենայն հավանականությամբ, կմերժի Մոսկվայի ԲԿՄԱ-ին

«Բարսելոնայի», «Լիվերպուլի» և «Բավարիայի» նախկին կիսապաշտպան Ֆիլիպե Կոուտինյոն դժվար թե ընդունի մոսկովյան ԲԿՄԱ-ի տրանսֆերային առաջարկը։ Ինչպես հայտնում է ESPN-ը, բրազիլացի ֆուտբոլիստը դիտարկում է կա՛մ կարիերան MLS-ում շարունակելու, կա՛մ այն ընդհանրապես ավարտելու տարբերակները։

33-ամյա ֆուտբոլիստն ավելի վաղ երկրպագուների կողմից գործադրվող ճնշումների պատճառով ժամանակից շուտ խզել էր պայմանագիրը բրազիլական «Վասկո դա Գամայի» հետ։ Այս պահին Կոուտինյոն ազատ գործակալի կարգավիճակ ունի։

Իր ակումբային կարիերայի ընթացքում բրազիլացի կիսապաշտպանն ամենաշատ հանդիպումներն անցկացրել է անգլիական «Լիվերպուլի» կազմում (201 խաղ)։ Այդ մրցավեճերում նա դարձել է 54 գոլի և 44 գոլային փոխանցման հեղինակ։

Transfermarkt-ի տվյալների համաձայն՝ 33-ամյա ֆուտբոլիստի տրանսֆերային արժեքն այժմ գնահատվում է 3,5 միլիոն եվրո։