Ամենակարևորը հաղթանակն էր, խաղի որակը դեռ կբարելավենք․ Սպերցյանը՝ Ռոստովի նկատմամբ տոնած հաղթանակից հետո

«Կրասնոդարի» և Հայաստանի հավաքականի կիսապաշտպան Էդուարդ Սպերցյանը մեկնաբանել է Ռուսաստանի Պրեմիեր լիգայի 19-րդ տուրի «Ռոստովի» դեմ հաղթական հանդիպումը (2:1)։

«Շատ կարևոր էր կենտրոնացվածությունը։ Լավ սկսեցինք, բայց գոլ խփելուց հետո դադարեցինք տիրել գնդակին։ Սա շատ կարևոր հաղթանակ էր և մենք ուրախ ենք վերադառնալ տուն ու խաղալ այստեղ։ Այս պահին ամենակարևորը արդյունքն է, իսկ խաղի որակը դեռ կբարելավենք», - նշել է հայ ֆուտբոլիստը։

Անդրադառնալով այն պահին, երբ մրցակցի խաղացողները փորձում էին խանգարել իրեն նախքան 11-մետրանոցի իրացումը՝ Սպերցյանը նշել է, որ դա իր վրա որևէ ազդեցություն չի ունեցել․ «Ես նախապես ընտրել էի անկյունը և չփոխեցի որոշումս»։ Տեսանյութը՝ այստեղ։

Սպերցյանը բարձր է գնահատել թիմի նորեկ Բոսելիին՝ նրան անվանելով որակյալ խաղացող, ով շատ արագ է հարմարվել թիմին և լավ հանդիպում է անցկացրել։

Այս խաղից հետո «Կրասնոդարը» 43 միավորով գլխավորեց մրցաշարային աղյուսակը։