Աշխարհի 16-րդ ռակետ, հայկական արմատներ ունեցող ռուսաստանցի թենիսիստ Կարեն Խաչանովը պատմել է, թե ինչով էր զբաղվում Դուբայում (ԱՄԷ), այն ընթացքում, երբ փակված օդային տարածքի պատճառով չէր կարողանում լքել երկիրը։
«Ընտանիքիս հետ Դուբայում էինք։ Ի սկզբանե ինձ հետ ամեն ինչ լավ էր, փառք Աստծո։ Պարզապես ընտանիքով ժամանակ էինք անցկացնում տանը։ Մի փոքր անորոշ վիճակում էինք՝ անհասկանալի էր, թե ինչ և ինչպես կլինի։ Կբացվի՞ օդային տարածքը, թե՞ ոչ, ինչ անել, ինչ ծրագիր կազմել՝ մեկնել, թե չմեկնել, մարզվել, թե ոչ։ Գնում էի մարզասրահ, փորձում էի պահել մարզավիճակս։ Պարզապես սպասում էինք, թե ինչ տարբերակներ կհայտնվեն։
Երեկ կարողացանք Օմանից մեկնել Ստամբուլ, իսկ այսօր առավոտյան գնում ենք Լոս Անջելես։ Կփորձենք հասնել Ինդիան-Ուելս՝ մրցաշարին մասնակցելու համար», — ասել է Խաչանովը First&Red տելեգրամ-ալիքում հրապարակված տեսանյութում։
