Կրիշտիանու Ռոնալդուի վնասվածքն ավելի լուրջ է, քան սպասվում էր. Ժորժե Ժեզուշ
«Ալ-Նասրի» հարձակվող Կրիշտիանու Ռոնալդուի վնասվածքն ավելի լուրջ է, քան ենթադրվում էր. հայտնել է սաուդյան թիմի գլխավոր մարզիչ Ժորժե Ժեզուշը:
Շաբաթ օրը Սաուդյան Արաբիայի առաջնության 24-րդ տուրում «Ալ-Նասրը» 3:1 հաշվով հաղթել է «Ալ-Ֆեյհային»: Ռոնալդուն փոխարինվել է 81-րդ րոպեին: Հաղորդվում էր, որ նա ունի ազդրի հետին մկանի վնասվածք:
«Վերջին խաղում Ռոնալդուն լքեց խաղադաշտը՝ գանգատվելով մկանային վնասվածքից: Բժշկական հետազոտությունից հետո պարզ դարձավ, որ վնասվածքն ավելի լուրջ է, քան սպասվում էր, և պահանջում է տևական հանգիստ ու վերականգնում:
Կրիշտիանուն մեկնել է Իսպանիա, ինչպես և մյուս խաղացողները, ովքեր բուժում են անցնում վնասվածքներից հետո: Նրա վնասվածքը պահանջում էր բուժում Մադրիդում՝ անձնական թերապևտի մոտ, և մենք հույս ունենք, որ նա արագ կվերադառնա և կօգնի թիմին», — ասել է Ժեզուշը:
Մարտի 3-ին հաղորդվում էր, որ Ռոնալդուի անձնական ինքնաթիռը լքել է Սաուդյան Արաբիան Էր-Ռիադում ԱՄՆ դեսպանատան վրա անօդաչու թռչող սարքերի հարձակումից հետո և ուղևորվել է Մադրիդ:
Հիշեցնենք, որ փետրվարի 28-ին ԱՄՆ-ն և Իսրայելը համատեղ ռազմական գործողություն են սկսել Իրանի դեմ: Իսլամական Հանրապետությունը պատասխանել է հարվածներով ամերիկյան ռազմակայաններին և այլ օբյեկտներին Իսրայելում, Կատարում, ԱՄԷ-ում, Սաուդյան Արաբիայում, Քուվեյթում և Բահրեյնում:
