65 կգ քաշային Արման Մուսիկյանը մեկնարկում տուշեով հաղթանակի է հասել հունգարացի Զոլտան Միժեիի նկատմամբ: Քառորդ եզրափակչում Արմանը ժամանակից շուտ առավելության է հասել շվեյցարացի Սանդրո Հունգերբյուլերի նկատմամբ, իսկ կիսաեզրափակիչում 6։9 հաշվով զիջել է Բելառուսի ներկայացուցիչ Մագոմեդխան Մագամեդխանովին ու վաղը «բրոնզե եզրափակիչում» կմրցի ադրբեջանցի Մուսա Աղաևի հետ։

70 կգ քաշային Դավիթ Մարգարյանը ժամանակից շուտ պարտվել է Ռուսաստանի ներկայացուցիչ Մագոմեդ Ելթեմիրովին։ Ռուսաստանի ներկայացուցիչը դուրս է եկել եզրափակիչ, ինչը Մարգարյանին տվել է բրոնզե մեդալի համար պայքարելու հնարավորությունը։ Հայ ըմբիշը վաղը սփոփիչ գոտեմարտ կանցկացնի իտալացի Դանիելե Ջուբիոտիի հետ։

79 կգ քաշային Հայկ Պապիկյանը 1/8 եզրափակչում ժամանակից շուտ առավելության է հասել էստոնիայի ներկայացուցիչ Տրիստան Ալեքսանդրովի նկատմամբ, սակայն քառորդ եզրափակչում 3-5 հաշվով պարտվել է լեհ Մատեուշ Պեջիցկիին: Լեհ ըմբիշը կիսաեզրափակիչում պարտվել է, իսկ Պապիկյանը լքել է պայքարը։

97 կգ քաշային Գուրգեն Սիմոնյանը նախնական փուլում 55 վայրկյանում առավելության է հասել իսպանացի Այմար Էգուինոայի նկատմամբ, սակայն քառորդ եզրափակչում 2։6 հաշվով զիջել է ադրբեջանցի Զաֆար Ալիևին, վերջինս կիսաեզրափակիչում պարտություն է կրել։

Վաղը՝ մարտի 10-ին, պայքարը կսկսեն 61 կգ քաշային Լևիկ Միքայելյանը, 74 կգ քաշային Գրիգոր Չոլակյանը, 86 կգ քաշային Ռազմիկ Եփրեմյանը, 92 կգ քաշային Կնյազ Իբոյանն ու 125 կգ քաշային Խաչատուր Խաչատրյանը։