Մաուրիսիո Պոչետինոն կարող է փոխարինել Ալվարո Արբելոային Ռեալի գլխավոր մարզչի պաշտոնում

Մադրիդի «Ռեալը» դիտարկում է Մաուրիսիո Պոչետինոյի թեկնածությունը՝ որպես հաջորդ մրցաշրջանում Ալվարո Արբելոային փոխարինող հնարավոր թեկնածուներից մեկը։ Այս մասին հայտնում է ESPN-ը։

Հիշեցնենք, որ «Արքայական ակումբը» Արբելոայի նշանակման մասին հայտարարեց հունվարի 12-ին։ Վերջինս փոխարինեց Խաբի Ալոնսոյին, սակայն նրա պայմանագրի ժամկետն այդպես էլ չհստակեցվեց։ Որոշ աղբյուրների պնդմամբ՝ ներկայիս մարզչին անհրաժեշտ կլինի «հրաշք» կամ հաղթանակ Չեմպիոնների լիգայում՝ հաջորդ մրցաշրջանում պաշտոնը պահպանելու գեթ մեկ հնարավորություն ստանալու համար։

Ըստ ESPN-ի աղբյուրների՝ մադրիդցիները կարող են Արբելոային այլ պաշտոն առաջարկել, այդ թվում՝ հնարավորություն վերադառնալու իր նախկին դերին՝ որպես «Ռեալի» 2-րդ թիմի՝ «Կաստիլյայի» մարզիչ։

Ինչ վերաբերում է թեկնածուներին, ապա ԱՄՆ-ի հավաքականի ներկայիս մարզիչ Մաուրիսիո Պոչետինոն այն մասնագետներից է, ում բարձր է գնահատում ակումբի նախագահ Ֆլորենտինո Պերեսը։ Պոչետինոյի անունը նախկինում ևս կապվում էր մադրիդյան ակումբի հետ, հատկապես 2019 թվականին, երբ նա «Տոտենհեմին» դուրս բերեց Չեմպիոնների լիգայի եզրափակիչ։

Բացի մարզչական հարցից, ESPN-ի մի քանի աղբյուրներ հայտնում են, որ հարցականի տակ է նաև սկաուտական բաժնի ղեկավար Խունի Կալաֆատի դիրքը։ Չնայած Կալաֆատը հիանալի հարաբերություններ ունի Պերեսի հետ, նշվում է, որ դա բավարար չի լինի ակումբում մնալու համար, եթե թիմը երկրորդ մրցաշրջանն անընդմեջ մնա առանց տիտղոսների։