Իրանի կանանց հավաքականի 5 խաղացող փախել է ավստրալացի ոստիկանների միջոցով
Իրանի կանանց ազգային հավաքականի հինգ ֆուտբոլիստուհիներ Ավստրալիայում ընթացող Ասիայի գավաթի ժամանակ փախել են թիմի տեղակայման վայրից, հայտնում է The Athletic-ը:
Կիրակի օրը Իրանի հավաքականը խմբային փուլի եզրափակիչ խաղում 0:2 հաշվով զիջել է Ֆիլիպինների ընտրանուն և դուրս մնացել մրցաշարից՝ զբաղեցնելով վերջին տեղը A խմբում: Այդ խաղից հետո նրանք կարողացել են փախչել հյուրանոցից: Ոստիկանությունն օգնել է աղջիկներին հեռանալ հավաքականի տեղակայման վայրից: Ներկայումս փախուստի դիմած ֆուտբոլիստուհիները գտնվում են ապաստարանում՝ Ավստրալիայի ոստիկանության հսկողության տակ:
Ավելի վաղ Իրանի պետական հեռուստատեսության հաղորդավար Մոհամմեդ Ռեզա Շահբազին քննադատել էր հավաքականի ֆուտբոլիստուհիներին, ովքեր Ասիայի գավաթի խաղերից մեկի ժամանակ չէին երգել ազգային օրհներգը՝ նշելով. «Պատերազմի ժամանակ դավաճանների հետ պետք է ավելի խիստ վարվել»:
Դրանից հետո FIFPro-ն դիմել էր ՖԻՖԱ-ին և Ասիայի ֆուտբոլի կոնֆեդերացիային (AFC)՝ խնդրելով ապահովել մարզուհիների անվտանգությունը:
Ինչպես հայտնում է The Athletic-ը, ՖԻՖԱ-ն, AFC-ն և Ավստրալիայի իշխանությունները քննարկում են Իրանի կանանց հավաքականի՝ երկրում մնալու ժամկետը երկարաձգելու հարցը՝ անվտանգության նկատառումներից ելնելով: Այս պահին թիմի համար հետադարձ չվերթ ամրագրված չէ:
