Առնե Սլոթ. Մրցավարը տուգանային էր նշանակում հայացքի համար
«Լիվերպուլի» գլխավոր մարզիչ Առնե Սլոթը կարծիք է հայտնել «Գալաթասարայի» դեմ Չեմպիոնների լիգայի 1/8 եզրափակիչի առաջին խաղում կրած պարտության (0:1) մասին:
«Մենք շատ լավ էինք խաղում, ավելի լավ, քան երեք ամիս առաջ էր: Ունեինք երեք կամ չորս հիանալի պահ, որոնցից լավագույնը Վիրցինն էր: Պետք է արժանին մատուցել մրցակցին այն բանի համար, որ նրանք յուրաքանչյուր դրվագի վերաբերվում են այնպես, կարծես դա իրենց կյանքի վերջին պահն է: Սա մի բան է, որը մենք հաստատ կարող ենք սովորել, քանի որ մեր հնարավորություններին վերաբերվում ենք այնպես, ասես առջևում դեռ 10 այդպիսի պահ է լինելու:
Եվ ահա մենք գոլ բաց թողեցինք: Այս Ստադիոնում խաղալը դժվար է նույնիսկ 0:0 հաշվի ժամանակ, իսկ բաց թողած գոլից հետո մեզ համար էլ ավելի բարդացավ ամեն ինչ:
Ինձ համար դժվար է դատել, բայց չեղարկված գոլի վերաբերյալ տարբեր կարծիքներ եմ լսել. այնտեղ ամեն ինչ միանշանակ չէ: Մրցավարը տուգանային էր նշանակում անգամ «Գալաթասարայի» խաղացողների կողմը նայելու համար: Միևնույն ժամանակ տեսեք, թե ինչպես էին քաշում Վան Դեյկին, նախքան գնդակը կդիպչեր Կոնատեի ձեռքին: Նման պարագայում կարելի է համարձակորեն ասել, որ այս հանդիպման մթնոլորտը տպավորություն է թողել ոչ միայն մեզ վրա», - նիդերլանդցու խոսքն է մեջբերում մերսիսայդցիների կայքը:
