Աստված իմ, սա մանկապարտեզ չէ. Կուրտուան խոսել է Ալոնսոյի և ֆուտբոլիստների հնարավոր կոնֆլիկտի մասին
Մադրիդի «Ռեալի» դարպասապահ Տիբո Կուրտուան հայտարարել է, որ թիմի ֆուտբոլիստները կոնֆլիկտ չեն ունեցել նախկին գլխավոր մարզիչ Խաբի Ալոնսոյի հետ:
Հիշեցնենք, որ Ալոնսոն հունվարին լքեց «Արքայական ակումբի» գլխավոր մարզչի պաշտոնը, որից հետո թիմը գլխավորեց Ալվարո Արբելոան: Չեմպիոնների լիգայի 1/8 եզրափակչում «Մանչեսթեր Սիթիի» նկատմամբ տարած հաղթանակից հետո (3:0), Կուրտուան անդրադարձել է մամուլում շրջանառվող լուրերին.
«Խաղացողներից ոչ ոք «չի տապալել» Խաբի Ալոնսոյին: Կարծում եմ՝ մենք լավ ենք աշխատել: Ոմանք ասում էին, թե մենք ատում ենք մարտավարությունը, ատում ենք տեսավերլուծությունները… Լսե՛ք, իմ մարզիչն է եղել Անտոնիո Կոնտեն, որն օրական մեկ ժամ աշխատում էր մարտավարության վրա, և ես դեմ չէի դրան, որովհետև մենք պրոֆեսիոնալներ ենք, և աշխատանքն ինձ համար առաջնահերթություն է:
Կարծում եմ՝ առաջին ամիսները Խաբիի հետ շատ լավ անցան, իսկ հետո անկում սկսվեց: Ֆուտբոլում նման բան պատահում է:
Մամուլում որոշ հրապարակումներ կարդացի և մտածեցի՝ «Աստված իմ»: Դուք կարծում եք, թե այս ակումբը մանկապարտե՞զ է, և մենք անում ենք այն, ինչ ուզո՞ւմ ենք: Բայց դա այդպես չէ: Մենք հարգում ենք բոլոր մարզիչներին, բժշկական անձնակազմին և առհասարակ բոլորին: Կարծում եմ՝ քննադատության մեծ մասն անարդար է: Որոշ տեղեկություններ ճիշտ են, և ես դրա հետ խնդիր չունեմ, դրա համար էլ ասում եմ ձեզ՝ մենք նույնպես մեղավոր ենք և թույլ ենք տվել, որ դա տեղի ունենա», — նշել է բելգիացի դարպասապահը:
