ԱԱ-2026. Ի՞նչ հետևանքներ կունենա Իրանի հնարավոր հրաժարումը մրցաշարից
Իրանի հավաքականի կողմից Աշխարհի 2026 թվականի առաջնությանը մասնակցելուց միակողմանի հրաժարվելու դեպքում թիմին սպառնում են լուրջ պատժամիջոցներ FIFA-ի կողմից, հայտնում է RMC Sport-ը:
Իրանի ազգային հավաքականները կարող են հեռացվել ՖԻՖԱ-ի հովանու ներքո անցկացվող բոլոր հետագա մրցաշարերից: Բացի այդ, նրանց սպառնում է նվազագույնը 275,000 եվրո տուգանք, որը կարող է հասնել մինչև 555,000 եվրոյի: Գումարի չափը կախված է մրցաշարից հրաժարվելու ամսաթվից:
Ավելի վաղ հաղորդվում էր, որ Իրանի հավաքականը կարող է հրաժարվել Աշխարհի առաջնությանը մասնակցելուց՝ ԱՄՆ-ի ագրեսիվ քաղաքականության պատճառով: Այս թեմայով արտահայտվել էր նաև ԱՄՆ նախագահ Դոնալդ Թրամփը:
Իրանի հավաքականը որակավորվել է ԱԱ-2026-ին և ընդգրկվել G խմբում, որտեղ նրա մրցակիցներն են Բելգիան, Եգիպտոսը և Նոր Զելանդիան: Թիմի բոլոր 3 հանդիպումները պետք է կայանան ԱՄՆ-ում:
Աշխարհի 2026 թվականի առաջնությունը կանցկացվի ամռանը՝ ԱՄՆ-ում, Կանադայում և Մեքսիկայում: Աշխարհի գործող չեմպիոնն Արգենտինայի հավաքականն է: 2022 թվականի առաջնության եզրափակչում Արգենտինայի ընտրանին հանդիպել էր Ֆրանսիայի հետ: Խաղի հիմնական ժամանակն ավարտվել էր 3:3 հաշվով, սակայն 11-մետրանոց հարվածաշարում ուժեղ էին գտնվել արգենտինացիները (4:2):
