UFC-ի միջին քաշային կարգի ամերիկացի հայտնի մարտիկ Բո Նիկալն աջակցել է թեթև քաշային կարգի վարկանիշային աղյուսակի երկրորդ համարի՝ Հայաստանը ներկայացնող Արման Ծառուկյանի տիտղոսային հավակնություններին։

«Նա անընդհատ ինչ-որ բանով զբաղված է՝ RAF-ի մենամարտեր, գրեփլինգ, նա անում է ամեն ինչ։ Կարծում եմ՝ Արմանը եզակի իրավիճակում է, քանի որ նա մեծ գումարներ ունի, ուստի նրա ելույթների նպատակը վաստակելը չէ։ Ծառուկյանը դա անում է ավելի շուտ սպորտի հանդեպ սիրուց դրդված, բայց նա միանշանակ արժանի է տիտղոսային մենամարտի։ Ես կցանկանայի տեսնել նրա մենամարտը Տոպուրիա - Գեյջի դիմակայության հաղթողի հետ», — Նիկալի խոսքերն է մեջբերում Red Corner MMA-ի էջը X սոցիալական ցանցում։

Հիշեցնենք, որ այս գիշեր հայ մարզիկը խեղդող բռնվածքով հաղթել էր Մուհամմադ Մոկաևին Hype Brazil գրեփլինգի մրցաշարում։