Մ23 ԵԱ․ Աղաջանյանը կպայքարի ոսկու, Հովեյանն ու Խաչատրյանը՝ բրոնզի համար

Սերբիայի Զրենյանին քաղաքում ընթացող Մ23 տարեկանների Եվրոպայի առաջնությունում այսօր պայքարի մեջ են մտել Հայաստանի 5 ներկաացուցիչ։

60 կգ քաշային Սուրեն Աղաջանյանը պայքարը սկսեց որակավորման փուլից, որտեղ 9։0 հաշվով ջախջախեց Ֆրանսիայի ներկայացուցչին։ Քառորդ եզրափակիչում հայ ըմբիշը 10։8 հաշվով պայքարից դուրս թողեց լեհ ըմբիշին, իսկ կիսաեզրափակիչում 9։։1 հաշվով առավելության հասավ Դանիայի ներկայացուցչի նկատմամբ։ Եզրափակիչում Աղաջանյանը կմրցի վրացի Գեորգի Կոչալիձեի հետ։

67 կգ քաշային Յուրիկ Հովեյանը պայքարը սկսեց 1/8 եզրափակիչից, որտեղ 8։0 հաշվով հաղթեց չեխ մրցակցին։ Քառորդ եզրափակիչում Հովեյանը զիջեց ռուս ըմբիշին։ Վերջինս հասավ եզրափակիչ՝ Հովեյանին ընձեռելով սփոփիչ գոտեմարտ անցկացնելու ու բրոնզե մեդալ նվաճելու հնարավորություն։

72 կգ քաշային Աշոտ Խաչատրյանը 1/8 եզրափակիչում 10։0 հաշվով ջախջախեց թուրք մրցակցին, սակայն քառորդ եզրափակիչում 2։8 հաշվով պարտվեց Ֆինլանդիայի ներկայացուցչին, ով հասավ եզրափակիչ։ Խաչատրյանը, սփոփիչ գոտեմարտում հաջողելու դեպքում, կպայքարի բրոնզե մեդալի համար։

82 կգ քաշային Մարտիկ Պետրոսյանը գերվստահ հաղթանակով մեկնարկեց որակավորման փուլում՝ 8։0 հաշվով հաղթելով Մոնտենեգրոյի ներկայացուցչին։ 1/8 եզրափակիչում Հովեյանը 3։11 հաշվով պարտվեց Բելառուսը ներկայացնող մարզիկին։

97 կգ քաշային Ռուբեն Գևորգյանն էլ զիջեց հենց մեկնարկում՝ 1։6 հաշվով պարտվելով էստոնացի ըմբիշին։

Գևորգյանի ու Պետրոսյանի մրցակիցները չկարողացան հասնել եզրափակիչ՝ զրկելով Հայաստանի ներկայացուցիչներին բրոնզե մեդալի համար պայքարելու իրավունքից։

Հիշեցնենք, որ քիչ անց բրոնզե մեդալի համար կպայքարի 55 կգ քաշային Մանվել Խաչատրյանը, իսկ Եվրոպայի Մ23 չեմպիոնի կոչման համար 77 կգ Սամվել Տերտերյանն ու 130 կգ քաշային Արամայիս Հարությունյանը։