Մենք արժանի չենք այս գավաթին․ Հակիմին հրաժարվել է Աֆրիկայի չեմպիոնի տիտղոսից
ՊՍԺ-ի և Մարոկկոյի ազգային հավաքականի պաշտպան Աշրաֆ Հակիմին մարտի 20-ին հանդես է եկել հայտարարությամբ՝ նշելով, որ ինքն ու իր թիմակիցները արժանի չեն Աֆրիկայի ազգերի գավաթի չեմպիոնի կոչմանը:
«Ես հրաժարվում եմ այս տիտղոսից և հուսով եմ, որ թիմակիցներս նույն կերպ կվարվեն: Մենք հաղթելու հնարավորություն ունեինք, բայց չկարողացանք օգտագործել այն»,- նշել է Հակիմին:
Մարոկկացի աստղը խոստովանել է, որ Սենեգալը արժանի էր հաղթանակի՝ եզրափակիչում ցուցադրած համոզիչ խաղի շնորհիվ: Ըստ Հակիմիի՝ Սենեգալն ազնիվ պայքարում հաղթել է Մարոկկոյին և վաստակել տիտղոսը. «Անարդար կլիներ փչացնել նրանց ուրախությունը այդքան ջանքերից հետո: Իմ թիմն ու ես չենք հաղթել 2025 թվականի Աֆրիկայի ազգերի գավաթը: Եվս մեկ անգամ շնորհավորում եմ Սենեգալին»:
Հիշեցնենք, որ ավելի վաղ Աֆրիկայի ֆուտբոլի կոնֆեդերացիան (CAF) վիճահարույց որոշում էր կայացրել՝ Սենեգալին զրկելով տիտղոսից և նրանց գրանցելով 0:3 հաշվով տեխնիկական պարտություն: Պատճառը հունվարի 18-ին կայացած եզրափակիչի ժամանակ մրցավարի որոշման դեմ ուղղված խաղադաշտում տեղի ունեցած բողոքի ակցիան էր: Արդյունքում Մարոկկոն ստացել էր գավաթը, թեև խաղադաշտում պարտվել էր 0:1 հաշվով:
CAF-ի որոշումից հետո Սենեգալը հայտարարել է Մարզական արբիտրաժային դատարան (CAS) դիմելու մտադրության մասին՝ արդարությունը վերականգնելու համար: Բազմաթիվ ֆուտբոլային աստղեր, մարզիչներ և նախկին խաղացողներ նույնպես իրենց վրդովմունքն են հայտնել կոնֆեդերացիայի որոշման վերաբերյալ:
